Corte den beroep a dicta sentencia diaranson 10 di januari contra e bisiñanan di Hotel Secrets: E bouwvergunning ta bon y e Hotel no ta causa ningun molester manera bisiñanan ta pretende.
Tabata dia 7 di juli 2023 cu hues a ordena pa hala aden e bouwvergunning cu a wordo otorga pa construccion di hotel Secrets na Sanicolas, indicando cu NO a tene na cuenta e obhecionnan haci dor di algun bisiña.
Gobierno mester a splica algun aspecto tecnico mas den extenso, cual a wordo haci debidamente. Habitantenan a apela e caso y dia 6 december 2023 e caso a wordo trata.
Diaranson e sentencia a cay y gobierno a gana e caso. E bouwvergunning # 2 ta corecto!
Hues a determina cu awor si ta suficientemente prueba cu e proyecto ta cumpli cu exigencianan di estetica (“welstand”) y cu e proyecto lo no causa molester (“hinder”) pa e vecindario. Cu esaki e di DOS bouwvergunning ta wordo considera como corecto.
Tratamento di e caso riba molester di sonido, lus y privacidad:
Intresante tabata e diberacion di hues, si un di e bisiñanan cu ta biba 135 meter leuw di e hotel, ta belanghebbende y tin molester di e proyecto.
Hues a determina cu entodo caso su bista no ta wordo stroba, pero hues a dun’e beneficio di duda ya cu el’a claim cu e lo haya molester di trafico y sonido di e hotel, y lus.
Hues a bisa cu e por ta belanghebbende y a bay evalua cada un di nan obheccionnan riba trafico, sonido y lus y a conclui cu e habitantenan no tin rason!
Ta bon pa informa cu tin algun caso mas cu lo tuma lugar den luna di Febuari.
Den otro articulo nos lo bay mas den extenso riba e decision di hues.
