Warda , spera, y deleita bo mes den Senjor, pasobra cosnan grandi y bon ta na caminda pa bo, no laga ningun hende descurasha bo mientras cu bo ta warda riba Senjor, pasobra esnan cu spera den Senjor lo tin forsa renoba.
Si abo ta kere cu Senjor por hacie pa bo ta suficiente, no comenta nada cu ningun hende, mantene bo bista riba Senjor pasobra pa Dios nada ta imposibel.
Y tur cos ta posibel pa esun cu ta kere, no desmaya, no tira serbete, no entrega , pero sigi perservera, sigi demontra bo fe, no murmura, sigi gradici, pasobra eyden bo confiansa den Dios ta wordo demostra y eynan bo madures ta manifesta.
Cuanto hende no ta cuminsa cu algo, pero pa despues pa palabra di otro hende, nan ta fria y descurasha, cuanto no ta lubida kico Dios a haci pa nan ayera, y awe nan ta demostra falta di fe, enbes di lanta ariba , pasobra e mesun Dios di ayera ta e Dios di awe, Dios no a cambia, pasobra Su misericordia ta eterno y Su amor no tin fin.
Hebreonan 11:6 ta para scirbi: Sin fe ta imposibel pa agrad’E, pasobra esun cu ta bini serca Dios,mester kere cu E ta,Esun cu ta recompensa esnan cu ta busca E.
Duda no ta bini di Dios, pidi algo na Dios , y duda cu bo ta hanje ta tempo perdi, pasobra si bo no ta kere, bo no por hanja nada, y Dios no por usa hende cu ta duda, pasobra ta hende di curason dobbel.( Santiago 1:8).
Pasobra Hesus a bisa bon cla den Mateo 21:22: Tur loke boso pidi den oracion cu fe, boso lo ricibi.
Ora nos tin e garantia ey for di Dios, nos no por laga ningun hende, bruha nos cabes, nos mester para firme y kere y nos lo mira nos victoria den Cristo Hesus.
Ta asina so nos lo vence,asina nos por cana, asina nos lo duna testimonio na nos yuinan, amigo y conocirnan di e grandesa di nos Dios, pasobra e palabra di Dios no ta cambia, nos por depende di Dios tur momento pasobra Dios ta fiel y poderoso.
E muher cu e fluho di sanger pa diesdos anja no a duda ningun momento, ni maske e hendenan di cas a di Hairo a bin bise cu su yiu a muri , Hesus a bise no tene miedo kere solamente.( Marco 5:21-36).
Awendia e enemigo ta purba tur manera pa trece duda y distraiccion den bida di hende, pero nos mester demostra; E fe di David contra Goliat,
E Fe di Ezequias contra Senaquerib,
E fe di Daniel den cueba di Leon,
E fe di Sadrac , Mesac, y Abednego,
E fe di Anna mama di Samuel,
E fe di Maria mama di Hesus,
E fe di Bartimeo,
E fe di Abraham,
E fe di Moises,pa asina porta wordo habri pa nos, y muraya lo cay, pasobra fe ta move montanja y fe ta demostra cu nos ta kere den e poder di Dios.
Pesey mi rumannan stima sea , firme, constante,semper abundando den e trabao di Senjor, sabiendo cu boso trabao no ta envano den Senjor.( 1 Corintionan 15:58).
Dios no ta lubida trabao di ningun hende, Dios ta fiel y ta mira tur cos y ta premia tur hende pa locual cu nan a haci pa su Gloria, serca Dios ningun hende ta wordo lubida.
Laga nos sigi haci bon tur momento pasobra ta pa Senjor nos ta traha, no tin mihor donjo di trabao cu nos Dios.
Sinceramente, Pastor Marcel Balootje
