E raton conoci como colilargo (Oligoryzomys longicaudatus) ta den foco di atencion internacional despues di a wordo identifica como e principal transmisor di e sepa Andes. E variante aki di hantavirus ta responsabel p’e brote recien riba e crucero di luho MV Hondius, caminda ya a confirma varios caso y persona cu a perde nan bida.
E animal chikito aki, cu ta pisa apenas 30 gram y tin un rabo cu por midi dos biaha e largo di su curpa, ta biba principalmente den e boskenan di Chile y e sur di Argentina. Segun experto André Rubio di Universidad di Chile, e colilargo ta un especie nativo protegi cu ta cumpli un funcion ecologico importante. Sinembargo, entre 5% pa 10% di e ratonnan aki ta carga e virus, un cifra cu por aumenta te cu 20% ora tin un crecemento explosivo di nan poblacion.
E contagio pa humano ta tuma luga ora e persona hala aire contamina cu particula di orina, scupi of sushi di e raton infecta. E sepa Andes ta particularmente peligroso pasobra e ta e unico cu por wordo transmiti di persona pa persona. Autoridadnan ta investigando e origen di e contagio riba e crucero, cu e hipotesis principal cu e prome victimanan a wordo exponi na tera firme durante un biahe den e region di Patagonia.
Rubio ta adverti cu e intervencion humano den naturalesa ta aumenta e riesgo di exposicion n’e virusnan aki. Pa preveni, ta recomenda pa semper ventila bon e cabañanan y bodeganan den zonanan rural, specialmente durante e lunanan di zomer ora e ratonnan ta busca cuminda cerca di caminda hende ta biba. Maske e situacion riba e crucero ta serio, expertonan ta pidi calma, splicando cu den aire liber e virus ta dura poco tempo y e raton aki normalmente no ta drenta den casnan asina facil manera e ratonnan comun.
