Nuebe boluntario di Cruz Cora Aruba a sali diadomingo mainta rumbo na Venezuela como parti di e prome mision di asistencia humanitario despues di e fuerte temblor cu a afecta e pais. E ekipo ta consisti di boluntario cu a pasa diferente training y cu tin experiencia den respuesta di desaster. Segun Marylaine Lopez, coordinador di desaster pa Cruz Cora Aruba, e prome mision tin un dobel proposito. Ademas di brinda asistencia inmediato, e ekipo lo evalua e situacion riba tereno pa prepara e siguiente fase di e operacion.
“Di parti di Cruz Cora, nos ta nueve boluntario cu ta sali. Cada boluntario tin su training y su experiencia. E plan ta pa bay brinda sosten, pero tambe pa evalua e situacion y reuni informacion cu nos por trece bek Aruba pa prepara e siguiente ekipo.” E boluntarionan cu ta participa forma parti di e Disaster Response Team di Cruz Cora Aruba. Nan a recibi training specialisa pa actua durante desaster natural y emergencia humanitario. Den e grupo tin varios persona certifica manera Emergency Medical Technician (EMT) y Emergency Medical Responder (EMR), capacita pa brinda prome asistencia medico. “E prome grupo lo instala e hospital temporario y prepara tur e logistica. Asina e siguiente ekipo medico por cuminsa cu su trabou mas lihe y di un manera organisa.” Lopez a expresa su orguyo den e compromiso cu e boluntarionan a mustra pa acepta e reto di representa Aruba den un mision internacional. “Mi ta hopi contento cu mi coleganan a acepta e reto aki. Mi ta sigur cu nos lo haci un bon trabou y cu nos lo hiba no solamente bandera di Cruz Cora, sino tambe bandera di Aruba hopi halto na Venezuela.”
Segun Lopez, a pesar cu Aruba ta un pais chikito, e apoyo cu ta brinda tin un gran significado pa e pueblo Venezolano y tambe pa e comunidad Venezolano cu ta biba na Aruba. “E tiki ayudo cu nos ta bay brinda ta significa hopi pa Venezuela. E ta mustra solidaridad y e deseo sincero di yuda den un momento dificil.” Cruz Cora Aruba ta inverti durante henter aña den training, practica y preparacion di su boluntarionan pa por responde na emergencia tanto na Aruba como den Caribe.
“Nos ta sigui entrena y mantene nos boluntarionan activo. No solamente pa emergencia na Aruba, pero tambe ora un pais vecino tin necesidad di apoyo.” Lopez a haci uzo di e ocasion pa invita nos comunidad pa bira boluntario di Cruz Cora Aruba. “Cruz Cora semper ta buscando boluntario nobo. Esnan cu kier aporta na comunidad por uni cu nos, sigui entrenamiento y forma parti di un ekipo cu ta cla pa yuda ora mas tin necesidad.”
E mision aki a bira posibel danki na e coordinacion estrecho entre Cruz Cora Aruba, Gobierno di Aruba, Crisis Management Office (CMO) y diferente partner internacional. Bou di liderazgo di Prome Minister Mike Eman, tur e preparacion logistico y administrativo necesario a wordo completa pa haci posibel cu e prome ekipo por sali rapidamente rumbo pa Venezuela.
