Un cacho di Aduana, cu ta getrain pa detecta placa a fayece. Esaki tin di haber cu negligencia diparti di e cuidador cu a keda responsabel cu e cacho. Director di Aduana, Sr. Ricky Croes a confirma e noticia diamars merdia atrves di Noticiero di Top 95 fm.
E reaccion di Director Croes a bini despues cu SOLO DI PUEBLO a emiti e informe extra oficial, cu un cacho di aduana a stik y fayece. E motibo ta cu el’a wordo lubida y a keda cera den auto.
Informacion adicional cu nos a ricibi ta mustra cu e cuidador di cacho a bay vakantie y a laga e cacho serca otro persona. Pa descuido a lubida e cacho den auto. Asina a circula riba medianan social. Na prome instante no por a confirma e noticia y a brinda espacio pa Aduana mes sali afor pa confirma.
E cachoc cu ta uno specialisa y getrain pa detecta placa tin algun tempo caba den servicio y ta cumpli cu su trabao diario cabalmente. No por keda sin meciona cu e cacho ta costa hopi placa.
Segun Director di Aduana Sr Ricky Croes a bisa na Top 95 Fm, cu e noticia ta confirma. Un caso lamentabel, pero berdad.
E cacho a wordo lubida den auto y a haya un “heatstroke” y a fayece. Kico ta un heatstroke? E cacho a keda den temparatura hopi halto, cual a subi su temperatura y defacto a ocaciona daño irreparabel na su funcionamento.
Riba e pregunta dicon no a informa pueblo di esaki, Sr. Croes a bisa cu e no kier a haci e team di cuidador di cacho mas dolor, pasobra nan ta hopi hopi kibra pa loke a sosopde.
Kico lo sosode cu e douanero cu a laga e cacho sofoca?
Director Croes a bisa cu su caso lo wordo atende via un un straf diciplinario. Tambe a informa DRH, Departamento di Recurso Humando riba e hecho aki y nan lo mester atende tambe cu e empleado. Sr. Juancho Werleman a bisa cu e cacho aki, no ta cualke cacho, e tin un status comosifuera un ambtenaar, pasobra e ta traha cu Aduana. Segun Juancho a puntra dicon no a laga Landsrecherche haci un investigacion, Director Croes a contesta cu nan no kier a bay asina leu den un proceso strafrechterlijk, pero a opta pa un medida diciplinario.
Fuentenan a bisa SOLO DI PUEBLO cu e cacho aki a fayece algun dia pasa caba, y kisas ta coincidencia, pero testigonan a mira hopi auto di Aduana staciona na Santana di Cacho, unda posiblemente a bay dera e cacho aki.
