DEPORTES – Den fin di siman, campeonato nobo di La Liga a inicia, diabierna prome wega a tuma lugar entre Valencia y Getafe y aki den prome wega Valencia ta gana Getafe cu score minimo di 1-0.
Diasabra tabata tin varios wega, pero e wega cu mayoria fanatico tabata pendiente di dje tabata entre Real Madrid y Deportiivo Alaves.
Real Madrid tin entrenador nobo cu ta Carlo Ancelotti cu un biaha mas ta tuma rienda di ekipo merengue, mientras cu ekipo e biaha aki no por conta cu servicio di su capitan di hopi aña kende ta Sergio Ramos cu no a yega na acuerdo cu ekipo y a bay Paris Saint Germain.
Prome mitar ambos ekipo a lucha pa yega na e gol pero ningun di dos ekipo a logra anota gol y asina prome mitar a bay den descanso cu score empata 0-0.
Den di dos mitar, Real Madrid tabata tin mihor wega y tabata na di 48 minuut Karim Benzema ta logra anota prome gol di wega pa duna Real Madrid ventaha cu score di 1-0.
Na di 56 minuut tabata Nacho Fernandez ta haci e wega 2-0 pa Real Madrid cu ya caba tabata mustra superior contra Deportivo Alaves.
Na di 62 minuut un biaha mas tabata Karim Benzema ta bay den contra atake y na prome instante keeper di Deportivo Alaves ta rechaza e tiro pero despues ta cay riba pia di Benzema cu ta anota e di 3 gpl pa Real Madrid.
Na di 65 minuut, Deportivo Alaves ta haya un tiro penal, caminda cu Joselu ta anota e gol y asina corta ventaha cu score di 3-1.
Den minuutnan extra Real Madrid ta sentencia e wega caminda Vinicious Jr. ta anota y haci e wega 4-1.
Asina tambe e wega a termina caminda cu Real Madrid ta logra prome victoria den campeonato nobo di La Liga 2021-2022.
