ORANJESTAD – “Mi ta felicita tur e homber y hende muhenan balente cu tur dia ta lanta pa por sirbi nan pais, brinda nos Pueblo y nos bishitantenan proteccion, pa conduci investigacionnan, salba bida, yuda nos grandinan y sali na defensa di esunnan cu no por y pa semper t’ey ora cu mas nos mester di nan. Tur esaki como ‘frontliners’ den un temporada sin precedente di pandemia”, asina Minister di Husticia, Siguridad y Integracion, mr. Andin Bikker a bisa relaciona cu celebracion di Dia di Polis. Tur aña ta para un rato keto pa celebra e fecha aki dia 16 di augustus. E aña aki sinembargo lo no tin mucho evento, debi na medidanan di Covid-19 y pa evita aglomeracion. Polisnan lo topa na Misa di Santa Cruz pa resa y pidi bendicion di Dios pa nan por sigui sirbi y proteha nos ciudadanonan y bishitantenan.
Riba un dia manera awe asina Minister Bikker ta para un rato keto si riba e esfuersonan grandi cu el a haci e ultimo cuater añanan. Na 2018 a duna miembronan unforma di KPA autoridad bek pa por controla personanan indocumenta riba nos isla. Na 2019 a reintroduci un helicopter moderno pa KPA por efectua vigilancia for di aire.
Tambe a reintroduci un radar sofistica cu capacidad pa detecta botonan di mas chikito (‘go fast’) y te hasta tin e capacidad di detecta spotnan di oil spill. A percura pa un flota nobo di auto pa henter e Cuerpo Policial, banda di otro ekiponan necesario pa por a traha cu ne. A percura pa bus y autonan nobo pa Scol di Polis. A percura pa auto nobo pa Slachtofferhulp. A percura pa presupuesto pa klasnan di aspirant-Polis na 2018 y 2019 y a percura pa na 2021 tin un klas di aspirant-Polis grandi cu ta un combinacion di klas 2020 y 2021, debi cu na 2020 no por a start un klas di aspirant door di e retonan di e pandemia.
A renoba partinan substancial di Scol di Polis. A percura pa pone e Mobile Command Center na puntonan strategico. A percura pa presupuesto pa introduci uniform nobo, a indexeer e “bon di cuminda” ora traha overtime y a percura pa e promocionnan ta “up to date.” Pa por mehora control y patruyahe preventivo, cu bista riba turismo crucero, a habri un ward’i polis nobo riba L.G. Smith Boulevard den e mesun edificio cu e stacion principal di bus na Playa.
