Federacion di Ahedres di Aruba (FAA) a clausura nan Campeonato Nacional Femenino y Masculino, na nan cede na Royal Plaza Mall. Sake di honor a keda den persona di Sr Yair Lichtensztajn, yui di Adolf Lichtensztajn (dfm) cu por cierto tawata un gran colaborador di Federacion di Ahedres y tambe Sr John Raymond Croes, yui di Robert “Wewe” Croes (dfm) cu tawata e prome Arubiano cu a competi den un Olympiada Mundial di ahedres.

Campeonato Nacional ta wordo hunga pa e 10 miho hungadornan masculino y femenino activo. Den e campeonato aki, tur hungador ta hunga contra otro durante 9 wega den nan respectivo categoria y ganador absoluto ta bira e hungador cu a acumula mas punto durante e campeonato.

Annelaine Jacobs tawata tin un bon prestacion kedando campeon invicto den e categoria Femenino, sigui di serca pa Lourdes Moreno y Thamara Sagastegui cu un empate na di dos luga. Tambe nos a haya bon prestacion di Lesley Cielo, Sylvi Cabral, Samanta Aponte, Brooke Lockhart, Haycarin Loyo, Denise Krosendijk y Joanne Timmermans den e categoria aki.

Nacional Masculino tawata tin un bataya fuerte lidera pa dos hubenil, Ilya Stetsenko y Kyell Jean Antonio, cual na final Ilya a titula campeon y Kyell sub-campeon. Jose “Chelo” Pesqueira y Jomar Benschop a keda empata pa di tercer luga. Na di cinco luga a keda veterano Octavio Croes, Gilberto Arends, Ayden Dirks, Angelo Franken, Mizpa Essed y Daniel Diaz.

Un campeonato cu a wordo culmina den un ambiente hopi ameno, unda miembronan di directiva Sra Perlishka Lockhart y Jose Pesqueira a haci entrega di premio na e ganadornan. Un danki sigur ta bay na tur cu a contribui pa haci e campeonato aki uno exitoso, sin laga afo directora/organisador di e torneo Sra Carol Pesqueira y Arbitro IM FA Lazaro Bueno.

Federacion di Ahedres ta sumamente satisfecho y kier a felicita tur participante pa e actitud deportivo, competitivo y disciplina cu a wordo desplega durante e campeonato.

LEAVE A REPLY

Please enter your comment!
Please enter your name here