Dialuna den oranan di mainta, a tuma lugar weganan di semi final di futbol damas pa loque ta trata weganan olimpico Tokyo 2020.
Den prome wega, e bataya entre 2 rival eterno, cerca di otro, Merca y Canada pa bira e prome finalista di futbol femenino.
Un bon wega, caminda claramente seleccion Americano tabata den gran dominio di e bala, mucho mas cu Canada den e wega aki, pero no a logra probecha di esaki pa anota gol.
Prome mitar a bay den descanso cu score empata 0-0, den di dos mitar e dominio di Merca a sigui y tabata constantemente den atake, pero manera e dicho ta bisa, esun cu hinca mas gol esey ta gana, na di 74 minuut, Canada ta haya un tiro penal na su fabor y aki Jessie Fleming ta haci e wega 1-0 pa Canada.
Despues di e gol aki, Canada a keda defende nan ventaha te ora cu referee a señala final di wega y asina Canada ta pasa pa gran final di futbol olimpico Tokyo 2020.
E di dos wega tabata entre Australia y Suecia, pa e di dos finalista cu lo enfrenta Canada den e gran final.
Tambe un wega hopi parew caminda ambos ekipo tabata busca manera di bay ariba, pero den prome mitar no a logra esaki y prome mitar a bay den descanso cu score empata 0-0.
Den di dos mitar, apenas 1 minuut di wega, Suecia ta bay ariba cu score di 1-0, cu gol anota pa Fridolina Rolfoe.
Cos a bira peor casi na final di wega pa Australia ora cu su hungador Ellie Carpenter a haya carchi cora direct, lagando asina Australia cu 10 hungador riba tereno.
Asina tambe e wega a termina cu score di 1-0 caminda Suecia ta bira e di dos seleccion cu ta clasifica pa final y lo enfrenta Canada pa medaya di oro.
Seleccion di Merca lo enfrenta Australia prome pa medaya di bronze.
