ORANJESTAD, Aruba – 25 di juli 2021: Tanto e marca di refresco mas bebi y gusta na mundo, Coca Cola, como tambe e ekipo di futbol Deportivo Nacional procedente di e districto di Noord, ambos a mantene nan puesto di ta campeon na Aruba. Ayera nochi Coca Cola Deportivo Nacional a titula campeon den futbol division di honor pa di seis biaha den nan historia!
Coca Cola Deportivo Nacional a bataya formal te vence La Fama cu score di 2-0 y asina titula campeon di Copa AVB 2021. E golnan tabata di Family Francois y Edward Wachi Clarissa. Tabata un tremendo wega cu a finalisa den un gran final pa e gran fanaticada cu tabata bon anima cu un brass band den e tribuna di La Fama, mientras den tribuna di Coca Cola Deportivo Nacional tabatin animacion di DJ Elizair Pourier y Michael Carthy.
A funda Deportivo Nacional dia 15 di Maart 1970 y desde e tempo ey a haci historia den e deporte rey di futbol. Nan ta profila den tur liga di futbol, manera ta division mini baby, baby, Lifida A, Lifida B, Mayor, Junioren y Division Honor. Tambe nan ta den e liga veterano 35, 40 y 50. Mas o menos 200 futbolista ta hunga pa Deportivo Nacional den tur division incluyendo e muchanan cu ta hunga den Lifida.
Desde fin di aña 2015 a inaugura nan veld di bala nobo situa na Alto Vista. Presidente di Nacional/Coca Cola ta Silo Brete y nan entrenador ta Dreyer Bracho. Ultimo biaha cu Nacional a bay cu e titulo di campeon tabata na aña 2016-2017. Den nan trayecoria a titula 6 biaha campeon y 7 biaha sub campeon y 1 biaha campeon Copa ABC. Deportivo Nacional ta conta pa hopi aña cu sosten di nan patrosinado Tropical Bottling Company cu nan producto Coca Cola.
