Por a tuma nota cu e cantidad di testnan pa loke ta Covid-19 ta bahando, segun minister Dangui Oduber. E ta sigui menciona cu a tuma varios decision caba y poco poco ta bay wak e resultado di e decisionnan cu a wordo tuma dos siman pasa, pa asina frena e plamamento di e virus aki
den comunidad. Den e prome dos simannan tabata registra un cantidad averahe di test di 1000 test mas of menos pa dia. Aruba ta wordo considera un di e paisnan cu ta test mas hopi na mundo. E ultimo siman aki esaki ta bahando, cual ta un indicacion si cu menos hende tin sintoma, pasobra e maneho ta dirigi riba esnan cu tin sintoma. Ta conseha tur esnan cu tin sintoma pa bay test y ta wak e ultimo dos simannan ta mayoria hende kier a test y a haci e test. Pero e siman aki ya caba esaki ta conociendo un reduccion drastico. Cantidad di test Actualmente e averahe ta entre 200 pa 300 test pa dia. Aruba a scohe pa hiba un maneho di test hopi agresivo. A menciona esaki na varios ocasion. Ora hiba un maneho di test agresivo, e resultado ta cu ta bay identifica hopi mas caso positivo, pa bo isola e persona aki pa evita cu nan ta sigui plama e virus aki den e comunidad. Otro paisnan ta scoge pa no test mes. Tin otro paisnan cu ta test solamente esnan cu ta wordo considera risicogroep. Tin otro paisnan ta test esnan cu solamente ta traha den cuido y tin otro paisnan ta test essential workers. Aruba, a scoge di test na un manera agresivo tur esnan cu tin sintoma. Otro paisnan no ta test mes. Riba e registro mundial, ora bo ta test, berdad esaki ta mustra bon pa bo pais. Pero di otro banda bo ta sconde e plamamento di contagio. Anto esaki por sorpresabo na dado momento pasobra bo ta perde control totalmente di con e virus aki ta manifesta den bo comunidad.
