Diaranson anochi a tuma luga e conferencia di prensa di gobierno, caminda cu Minister diSalubridad Publico, Turismo y Deporte a duna un update pa loke ta e cantidad di casonan
positivo di Covid-19. E mandatario a menciona cu a keda registra 40 persona cu a recupera completamente di Covid-19. Manera ta conoci, dos siman y mey pasa tabata tin e prome casonan di transmision den un club nocturno. A anticipa cu lo bay bin hopi caso positivo y esaki ta e realidad cu ta bibando cun’e tambe actualmente. Pero di un otro banda, e mandatario ta continua, cu 40 persona adicional a recupera. 91 caso positivo nobo a wordo registra awe. E situacion actual tin un registro total di 974 caso activo. Na hospital tin 20 persona interna, di cual 2 persona ta den ICU. Edad averahe Tin cu menciona cu den e prome dos simannan e edad averahe di esnan cu a test positivo tabata 31 aña. Esaki a cambia e siman aki. Ta un indicacion cu esnan contagia inicialmente a contagia personanan cu ta biba hunto cu nan den cas y ta wak e personanan cu ta biba hunto cu nan, e asina yama Tweede Kring, a wordo contagia. A nota tambe den e edad averahe cu e ta subiendo. Ya caba ta registrando un edad averahe di 42 aña y ta spera cu e Tweede Kring no sigui contagia mas hende pasobra esey si ta bira hopi peligroso, pasobra e ora bo ta bay pa contagia esnan cu tin un edad mas halto. Logicamente, manera ta conoci, mas edad persona tin, mas peligroso Covid-19 por ta. E situacion sigur ta uno serio. Na momento cu ta keda registra casonan positivo diariamente, a spera esaki. Pero naturalmente bo kier percura pa plama e transmision mas tanto posibel, esey ta e strategia cu ta implimentando.
