Militarnan Arubiano y Curasoleño (CARMIL) ta trein e siman aki na Aruba hunto cu e Unidad Mobil (ME) di Cuerpo Policial Aruba (KPA) y e Unidad K9 di KIA (Instituto Coreccional Aruba). E ehercicio ta enfoca riba actuacion di de-escalacion durante disturbionan civil, tambe conoci como “Beteugelen van Woelingen” (BVW), (Supresion di Disturbio) y ta prepara e partnernan militar y di seguridad Caribense pa responde na disturbionan di orden publico.
Treining a tuma luga tanto na Kazerne di Marina Savaneta como na otro sitio durante e dianan cu a pasa. Riba diahuebs, 23 di april, e scenario final di e ehercicio lo tuma luga den e ‘pueblo bieu di Esso’ na Seroe Colorado. Den un scenario realistico, Gobernador di Aruba ta wordo confronta cu un grupo di manifestante cu ta busca pa regla cuenta cu e alcalde di un pueblo. Segun cu e situacion ta menasa di escala, asistencia militar ta wordo yama den forma di un peloton di solda. E ehercicio ta consisti di varios sub-scenario den cua e tensionnan entre manifestantenan y autoridadnan a escala. Durante e scenarionan aki, trupanan di Caribe ta wordo confronta cu violencia creciente. Central den e ehercicio final aki ta de-escalacion y cooperacion cu socionan di seguridad local.
Pelotonnan di Supresion di Disturbionan
Como un partner di seguridad relevante pa duna asistencia militar na Aruba, Curacao, Sint Maarten, y e islanan BES (Bonaire, Sint Eustatius, y Saba), CZMCARIB tin dos peloton di supresion di disturbio (‘riot suppression’) entrena na su disposicion. E unidadnan aki ta completamente ekipa pa personal di CARMIL y ta desplegable pa sostene orden y seguridad publico. Tanto Curacao como Aruba tin nan propio peloton di BVW y ta practica regularmente diferente scenario. Danki na e tipo di ehercicionan aki, trupanan di Caribe ta keda prepara pa diferente scenario den caso di disturbionan di orden publico.
