Dienst Uitvoering Onderwijs (DUO) ta amplia su servicionan existente den region Caribense. For di e luna aki, e oficina di servicio na Corsou ta ofrece e posibilidad pa haci yamada di video cu un empleado. Ademas, e-learning pa futuro studiantenan, cu anteriormente tabata uza na Corsou, awor ta ofrece tambe na scol na Aruba.
No tin diferencia di ora mas
Desde e periodo di corona, DUO tabata ofrece caba posibilidad pa haci yamada di video cu empleado na Hulanda. Studiantenan y ex studiantenan por a acudi cerca nan cu pregunta tocante finansiamento di estudio of pago di debe di estudio. Sinembargo, debi na e diferencia di ora entre Hulanda y region Caribense, e cantidad di e orarionan disponibel tabata limita.
Cu introduccion di yamada di video via e oficina di servicio na Corsou, e problema aki ta algo di pasado. Studiantenan y ex studiantenan por tuma contacto awor mas facilmente y na mas momento cu un empleado di DUO.
E servicio di yamada di video ta disponibel pa habitante di Aruba, Sint Maarten y Boneiro, Sint Eustatius y Saba (Hulanda Caribense). Tambe studiante y ex studiante na Corsou por haci uzo di esaki ora cu un bishita na e oficina di servicio no ta posibel. Por haci e yamada di video facilmente via laptop, tablet of telefon celular.
Por traha cita pa yamada di video via www.duo.nl/cariben.
E-learning amplia pa Aruba
Anteriormente den e aña escolar aki, mas di 500 alumno di havo 4 y vwo 5 di tur scol secundario na Corsou a haci uzo di e e-learning. Den e herment online aki nan ta siña, entre otro, tocante finansiamento di estudio, seguro, subsidio, vivienda y administracion financiero. Alumno ta indica cu pa medio di esaki nan a haya un miho bista riba e asuntonan practico cu nan lo mester enfrenta na Hulanda.
Pa motibo di e resultadonan positivo, awor ta ofrece e e-learning tambe na Colegio Nigel Matthew y De Schakel na Aruba. Ademas, ta investiga si por uza e material di les tambe na otro scol secundario den region Caribense.
DUO ta ehecuta, pa e Ministerio di OCW, entre otro ley y regla riba tereno di finansiamento di instancia educativo, otorgamento y cobransa di finansiamento di estudio y compensacion di gasto di scol, y e maneho di e proceso di reconocemento y legalisacion di diploma.
