Sr. Ariel Lopez (e ‘tata’) ta un stranhero cu a drenta Aruba dia 07-11-2019 cu objetivo di estadia turistico y ta mantene un relacion sentimental cu Sra. Rosaura Miguelina Groeneveldt (e ‘mama’), naci na Aruba dia 18-08-1995.
28-01-2020 ta entrega un peticion di estadia, como personal domestico (huishoudelijk personeel) pa Lopez, cu ta wordo nenga dia 21-04-2020. Lopez ta apela dicho negacion y riba 16-11-2020 e apelacion ta wordo declara nulo:‘ongegrond verklaard’.
Mientras tanto, di e relacion afectivo aki a nace un yiu: Jeremias Mariano Groeneveldt a nace 19-03-2021 (e ‘yiu’). Despues di nacemento di e baby a cuminsa cu e proceso di establece paternidad: ‘vaststelling di vaderschap’ via DNA test, cu ta tuma su tempo, pa asina e tata por a oficialmente reconoce su yiu.
Una vez cu e resultado a drenta di e DNA test, a bai over pa reconoce e yiu (‘akte van erkenning’). E erkenning ta tuma lugar dia 05-07-2021. Despues di esaki nan a acudi na DPL pa solicita un notificatiebrief, caminda nan a wordo notifica cu mama cu tata mester tin gezamenlijk gezag pa bai over na duna e notificatiebrief.
Mas o menos mesun temporada cu ta entrega e peticion pa gezamenlijk gezag na Corte, e tata ta wordo deteni door di GNC pasobra durante un control di trafico ta resulta cu e no tin status legal. Remarcabel ta cu na GNC mes nan ta manda e mama na un “abogado” cu supuestamente por yud’e saca e pareha for di GNC.
Dia cu e caso di e solicitud pa gezamenlijk gezag ta wordo atendi, Lopez no ta haya permiso di GNC pa atende e behandeling na Corte. E mama ta aparece su so y ta splica e situacion na Corte. Y asina e ta logra pa nan atende e caso y ta obtene gezamenlijk gezag.
