Paul Croes tabata hopi emociona y cu wowo yen awa

Caso kitamento di pertencia di Paul Croes trata den Corte Superior

– Awe merdia 2’or, Hof di Corte Superior a trata e apelacion di Paul Croes contra e sentencia di 2 December 2021, caminda Hues a hay’e culpable di labamento di placa y a ordena cu Paul Croes mester paga mas 83.489 florin of 1 aña di prison.

SOLO DI PUELBO por a compronde cu e biaha aki Paul Croes a presenta den Corte.

PG A EXIGI PA MANTENE SENTENCIA

Procurador General (PG) a bisa Hof cu Ministerio Publico kier pa mantene e decision di Hues di Corte den Promer Instancia. PG a mustra cu na November 2023, abogado mr. D.Croes a pidi pa scucha testigonan pa mustra e placanan cu a haya pa asina mustra cu no tabatin labamento di placa. Hof a dicidi pa manda cartanan y no ta necesario scucha testigonan. PG a mustra cu abogado a bisa cu tabatin bendemento di pannan yena y otro cosnan pa yega na placanan. PG a bisa Hof cu e no ta haya e declaracionnan confiabel. PG a mustra cu ta papia di bendemento di headpiece pa carnaval cu Melony a traha pero no ta splica na kende e placanan a wordo paga. PG ta haya cu e placanan aki ta na beneficio di e grupo di carnaval. E trahamento di pannan yena cu Melony a traha tambe no tin claridad. PG ta haya cu Belasting mester check entradanan apart. PG a sigui bisa cu tambe ta papia di bendemento di puppy’s na balor total di 14 mil florin. El a remarca cu si haci calculacion, ta 8 puppy y mey a wordo bendi si ta papia di algo mas di 1700 florin pa puppy. PG a conclui cu Hof mester mantene e sentencia.

ABOGADO

Mr. D.Croes a bisa Hof cu despues di eleccion 2013, Paul Croes bira minister. El a casa y tabatin regalonan di placa di casamento. Na 2014, a haci denuncia contra Paul Croes. Riba orden di Ministerio Publico, a haci investigacion na cas di Paul Croes na 2017 dos biaha y a confisca cosnan. Paul a keda 80 dia encarcela y despues laga liber.

MEDIA PA CASTIGA PAUL CROES

Na opinion di mr. Croes, tabatin un circo den medio cu e caso aki. E ta haya cu Paul Croes a wordo suficiente castiga door di media. E abogado ta haya cu Hof mester rechaza e sentencia pa kita pertenencia. E abogado a cuestiona e forma con media a afecta Paul Croes. No a tene cuenta cu no por pinta Paul Croes scur promer cu e haya condena. Na opinion di mr. Croes, den media social, caso Avestruz a haya mas o menos 13 mil hits, caso IBIS di Paul Croes tin mas cu 1.8 miyon hits. E abogado cu un monton di documnento den man di publicacionnan cu a sali di Paul Croes a mustra Hof di un parti di e publicacionnan. El a mustra riba e conferencia di prensa di Ministerio Publico tocante Paul Croes. Tambe a transmiti pa promer biaha caso Paul Croes via Corte den Piedra Plat Entertainment Center. Esaki cu e intension cu Paul Croes mester wordo colga. E ta haya cu no a tene cuenta cu esaki den e castigo compara cu caso Avestruz.

E abogado a bisa Hof cu ta pa promer biaha den historia cu ta investiga un minister. E ta haya cu Ministerio Publico no a sigui e procedura corecto y pesey mester declara Ministerio Publico no admisibel.

   E abogado a menciona cu a surpasa e periodo pa cu e caso. El a menciona EVRM (Derechonan Humano) caminda ta mustra riba e periodo husto di proceso hudicial cu ta 2 aña. Na opinion di mr. Croes, den caso Paul Croes a surpasa esaki hopi. El a menciona cu Corte Supremo ta mustra cu mester compensa ora surpasa e periodo, door di baha e cantidad cu mester kita di pertenencia. E ta haya cu mester desconta cu 10 mil florin.

   E abogado a mustra cu na regalo di casamento, e pareha a haya mas cu 67 mil florin. E bendemento di 7 puppy, bendemento di pan yena, bendemento di headpiece. Tur esakinan ta yega na 142,600 florin cu mester desconta for di e mas cu 183 mil florin cu a ordena pa Paul Croes paga of kita di pertenencia. E ora ey ta resta, algo mas di 46 mil florin.

  Abogado a bisa Hof cu Paul Croes a keda financieramente afecta. A kit’e como minister y despues como empleado di Gobierno. Ademas Paul Croes mester a haci casi 250 mil florin gasto na asistencia di abogado. Mester a huur su cas RB&B pa asina por genera placa. Actual, Paul Croes ta sintando castigo di 3 aña den KIA.

CASTIGO NO HUMA

E abogado a bisa cu pa 80 dia Paul Croes tabata sera su so. Segun regla di Nacionnan Uni, e maximo ta 15 dia. E unico bishita cu Paul Croes tabata haya ta di djaca y cancrew. Na opinion di mr. Croes, esaki tambe ta violacion di reglanan di EVRM, cu ta bisa cu e lugar mester ta hygienico. El a mustra cu tin raportnan cu ta mustra cu KIA no ta apto. E abogado a bisa Hof cu Croes a wordo sera den e seccion di hendenan cu problema mental. E famia a keda afecta door di e caso aki. E abogado ta haya cu teniendo cuenta cu tur e sancionnan menciona, Paul Croes no ta den e posicion di paga e suma cu Corte ta ordena pa paga. E lo mester bay traha den sector priva y mirando tur e publicacion contra dje, ta bira hopi nivel. Abogado a pidi Hof pa haci e suma nihil of pa baha esaki drasticamente.

   PG a bisa cu loke abogado a bisa ya a wordo treci padilanti den e caso penal, cual a wordo rechaza. PG ta haya cu Ministerio Publico no a surpasa e periodo stipula pa ley. Ta asina cu tin beslag pone riba cas di Paul Croes for di 2018.  

PAUL CU WOWO NA AWA A PAPIA

Paul Croes a bisa Hof, cu despues di 16 luna atrobe e ta para dilanti Hof. No ta nada facil. El a bisa cu 7 aña a afecta e y su famia nan bida. E ultimo 13 luna e ta mas mas afecta, door cu e ta sera den KIA sin su famia. Segun Paul Croes, ta promer biaha den historia cu un politico ta sera. Ariba pregunta di Hof, el a splica con el a pasa 80 dia sera, sin por a haci nada. E no por a haya ni bijbel pa lesa. Ademas e tabata sera den un seccion pa hendenan cu problema mental.

El a bisa cu e situacion den KIA no ta bon. El a invita Hof pa djis haci un bishita. El a bisa cu e lugar no ta hygienico y cu tin mas o menos 60 pussy ta cana rond. Tin masha hopi paloma y tur e sushi ta bin den e celnan. Ainda e falta 8 luna mas den KIA.

   Paul Croes kier a lesa un carta cu el a skirbi pero su emocionnan a subi y wowonan a yena cu awa. El bisa Hof cu ta keda na Hof pa determina cuanto mas e lo mester keda sufri. Hof  a sera tratamento di e caso y a bisa cu dia 2 Mei 2024 pa 2.15 lo dicta sentencia.

LEAVE A REPLY

Please enter your comment!
Please enter your name here