El a wordo deteni den sala di Corte

Coach di team di baseball condena na 6 aña di prison pa a abusa di dos mucha homber

ORANJESTAD – Awe mainta e homber R.(51) a presenta na Corte di Husticia pa scucha su sentencia. E ta wordo acusa di, como coach di un team di baseball, a abusa di dos mucha durante 2014 y 2016.

   SOLO DI PUEBLO por a compronde cu Hues a confirma e exigencia di Fiscal esta 6 aña di prison y a duna orden pa detene R. di biaha den sala di Corte

FISCAL A EXIGI 6 AÑA DI PRISON

Tres siman pasa tratamento di e caso a tuma lugar caminda Fiscal a mustra cu R. ta wordo acusa di en total 6 acusacion, 3 di cada un di e muchanan. E abusonan ta encera, mishimento, actonan inmoral y penetracion di e muchanan di parti patras. E lamentable casonan aki mester a sosode entre 2014 y 2016. R. e tempo ey tabata liber y a presenta den Corte pa tratamento di e caso. Ta asina cu e dos muchanan ta famia di e defunto señora di R.

   E caso a bin na claridad ora cu na Juni 2023, e dos hobennan a bay Polis pa haci denuncia. E dos hobennan a declara cu nan tabata hunga den e team di R., kende tabata encarga cu un team di muchanan entre 7 y 9 aña y un team di muchanan entre 13 pa 15 aña. E mayornan di e dos victimanan tabata confia R. pa busca e muchanan y hiba nan train of trece nan cas. E hobennan a declara cu R. tabata hiba nan na su cas y abusa di nan. E abusonan tabata encera cu R. tabata mishi cu e muchanan y pone e muchanan chupa su parti intimo, despues e ta chupa di nan. Despues e tabata penetra nan di atras. Cada abuso tabata sosode separa o sea un biaha ta un y otro biaha tabata e otro. E tempo ey, un di e victimanan tabatin 9 pa 10 aña, mientras cu e otro tabatin 8 aña. Ta asina cu e muchanan a presenta daño per juico contra R. pa tur e abuso cu nan a sufri. Ta asina cu un di e hobennan a bira malo y mester a haya tratamento na Respaldo.

   Durante tratamento di e caso Hues a mustra cu R. a desmenti categoricamente na Polis y den Corte di e acusacionnan. El a bisa cu tur esaki ta un gañamento pasobra e famia di e banda di su difunto señora no tabata gust’e of sali bon cun’e.

   Fiscal a bisa cu e dos victimanan a conta detaya kico tur a sosode y Fiscal ta haya cu no tin motibo pa duda. Fiscal a exigi 6 aña di prison pa R. y a pidi Hues pa aproba 15 mil florin di daño pa cada mucha. Tambe Fiscal a exigi pa detencion di biaha di R., pero Hues a bisa cu dia di sentencia lo e dicidi riba esey.

SENTENCIA

Hues a bisa cu e ta rechaza e defensa di abogado cu no tin prueba. Hues a mustra cu R. a mishi, haci actonan inmoral y abusa sexual di dos mucha. Hues a mustra riba declaracion di un di e victimanan kende a bisa con R. a invit’e pa bay su cas y a abusa di dje. E otro victima, durante entrenamento den cuartel militar a conta su Corporal cu el a wordo abusa door di un coach di baseball.

   Hues a mustra tambe cu un di e victimanan mester a haya tratamento na Respaldo y eynan el a conta kico tur a pasa cun’e. Hues ta haya cu e declaracionnan aki y e declaracion di mayornan di un di e victimanan confiabel. Hues a bisa cu e no tin motibo di duda den e declaracionnan.

   Hues a bisa cu e ta haya cu tin pruebanan cu R. a abusa di 2 mucha kendenan tabata entre 8 y 12 aña, siendo cu nan ta famia y R. tabata nan coach di baseball. Hues a sigui bisa cu R. a abusa di nan den su camber. Esaki a sosode diferente biaha. Hues a bisa cu R. a bisa cu e no a abusa di e muchanan pero Hues no ta kere R. Hues a bisa cu e ta haya tur acusacion proba.  

   Pa cu e castigo, Hues a bisa cu e ta tene cuenta cu ta un caso hopi serio. Durante un periodo largo R. a abusa di dos mucha cu tabata na su encargo como coach. Hues ta haya cu R. no a tene ningun momento cuenta cu e sentimento di e muchanan sino a probecha di nan pa satisface su mes. Hues ta haya cu R. a tacha e integridad di e muchanan.

Hues a bisa cu experencia a mustra cu victimanan di abuso lo por keda pa hopi tempo afecta. Den e caso aki a resulta asina tambe. Hues a tuma R. na malo pa esaki. Hues a bisa cu loke ta pisa mas den e caso aki ta cu R. a penetra e muchanan di patras y pa un periodo largo.

CASTIGO

   Hues a confirma e exigencia di Fiscal y a condena R. na 6 aña di prison, kitando e tempo cu e ta sera den KIA. Tambe Hues a duna orden pa detencion di inmediato.

   Hues a ordena R. pa paga daño di algo mas cu 17 Mil florin, e resto el a declara no admisibel y cu e famia lo por cuminsa un caso civil. E mesun cos el a dicidi pa e otro victima. Hues a bisa cu e ta pone medida di pago pa cada un di e victimanan y si R. no paga, pa cada un e lo mester bay mas cu 300 dia sera. Despues di e sentencia, miembronan di CEA a bay riba R. y a detene y hib’e patras pa asina e wordo hiba KIA pa e sinta su castigo.

LEAVE A REPLY

Please enter your comment!
Please enter your name here