Dialuna mester a tuma lugar e caso penal cu Ministerio Publico a cuminsa contra e homber E.J.F. (33), ex miembro di Guarda Costa. Fiscal ta acusa E.J.F. di diferente delito. Ariba peticion di abogado mr. Carlo, Hues a pospone tratamento di e caso.
SOLO DI PUEBLO por a compronde cu abogado mr. Carlo a manda mail pa Hues informando cu Fiscal a manda e documentonan laat y e no a haya tempo di studia esakinan hunto cu su cliente.
ACUSACIONNAN
Ta asina cu E.J.F. no a presenta den Corte. Abogado mr. Carlo a bisa Hues cu door cu E.J.F. no ta di acuerdo cu a cuminsa un caso penal, e no a presenta pero lo bay ta presente ora di tratamento di e caso.
Fiscal a bisa cu e acusacionnan contra E.J.F. ta:
– Dia 13 Maart 2023, hunto cu otronan a horta un motor di boto, usando su poder of oportunidad como miembro di Guarda Costa.
– Fiscal tambe ta acusa E.J.F. di incubrimento di flares y balanan entre 4 Maart y 11 Maart 2023.
– Fiscal tambe ta acusa E.J.F. di a mata of a herida un cantidad di calco, siendo animalnan proteho pa ley.
– Fiscal ta acusa E.J.F. di a pone otronan ( door di regalonan, promesanan, mal uso di autoridad, violencia, menaza of estafa) of door di duna nan oportunidad/informacion, a mata of herida calconan entre Augustus 2023. A duna intencionalmente informacionnan tocante piki calco den awanan teritorial di Aruba y paga of haci palabracionnan tocante compra/pago di calco.
HUES A POSPONE E CASO
Hues a bisa cu e intension tabata pa trata e caso pero abogado mr. Carlo a haci un peticion pa pospone e caso, door cu el a haya e documentonan di e caso laat. Hues e ora ey a pensa pa haci e tratamento un forma caminda abogado por haci peticion si e kier pa haci cierto investigacion.
Abogado a bisa Hues cu ta imposibel pa e haci peticion pasobra e no a haya chens di studia e caso cu su cliente. El a bisa Hues cu na December 2025 tabatin Tomzitting, caminda E.J.F. a nenga di accepta castigo pasobra cu e no ta haya cu e ta culpabel y Fiscal a laga sa cu lo bin un caso penal.
E abogado a bisa Hues cu el a pidi Fiscal diferente biaha pa haya documentonan di e caso. Awor, el a haya e documentonan laat y no a haya chens prepara e caso. Ariba pregunta di Hues, abogado mr. Carlo a bisa cu e ta kere cu pa fin di Juni 2026, e lo manda su peticionnan pa tanto Fiscal como Hues. E abogado a splica cu e lo ta cla e ora ey di a consulta y studia e caso cu su cliente. Mr. Carlo a bisa Hues cu henter e caso ta basa riba tap di su cliente. E ta haya kico tabata e motibo cu a tap su cliente. Tambe el a mustra cu tin diferente testigonan cu e kier lesa nan declaracion promer cu e bay haci peticionnan.
Hues a bay di acuerdo y fiha un otro regie zitting pa 6 Augustus 2026.
