Diahuebs mainta Hues ta haya e hoben Q.P. (19), culpabel di posecion di arma. A base di ley, si tin obhetonan cu ta parce arma di candela cu cual por menaza of spanta hende, esaki ta wordo considera como arma. Esey ta e caso cu e hoben Q.P.
SOLO DI PUEBLO por a compronde cu Hues a rechaza e defensa di abogado cu no por ta asina cu riba un yamada anonimo ta bay haci full un investigacion. E ta haya e investigacion inhusto y cu e potretnan no por wordo usa como prueba.
Tratamento di e caso a tuma lugar 25 Augustus 2026 caminda e acusacion cu Fiscal a presenta contra Q.P. ta cu entre 27 April y 3 Juni 2026 e tabatin potretnan di pistoolnan y revolvernan den su cellular. En total tabatin 17 potret.
EXIGENCIA DI FISCAL
Fiscal a bisa cu e ta tene cuenta cu Q.P.(19), ta promer biaha cu e ta cay den man di husticia pa un caso serio asina. El a mustra cu tin maneho stipula di Minusterio Publico. Fiscal a bisa cu no ta tolera cu tin arma ta circula. El a mustra riba e actitud di Q.P. di no kier bisa nada di e otro dos armanan cu e tin scondi. Fiscal a exigi 24 luna di prison di cual 6 luna ta condicional cu 2 aña di prueba.
SENTENCIA
Ayera mainta Hues a bisa cu el a evalua leynan, entre otro riba e ponencia di abogado encuanto informacion anonimo. Hues a mustra cu ley ta bisa cu un informante anonimo mester duna suficiente informacion valioso y concreto. Hues ta haya cu esey ta e caso y Ministerio Publico por a cuminsa investigacion. Esey ta haci cu e investigacion ta husto. Hues a mustra cu a base di observacion y informacionnan, Polis por a para Q.P. y listra e auto y confisca e cellularnan. Hues a rechaza defensa di abogado tanto cu e investigacion ta inhusto, como cu no por usa e potretnan den cellular. Hues ta haya legalmente proba cu Q.P. tabatin potretnan den su cellular pero no por bisa cu ta armanan di candela. Hues a bisa cu e ta duda cu ta arma di candela real.
Hues ta haya proba cu Q.P. tabatin obhetonan cu ta parce arma cu por usa pa menaza hende. En todo caso tin 3 potret cu ta parce na arma di candela real.
Pa cu e castigo, Hues a bisa cu e ta tene cuenta cu sentencianan di Hof, cu ta bisa cu si no ta un arma di berdad, mester baha castigo. Tambe Hues a tene cuenta cu Q.P. ta promer biaha cu e ta cay sera. Hues a cuestiona e hecho cu Q.P. no kier a bisa unda e armanan fake cu e tin scondi ta. Hues a condena Q.P. na 6 luna di prison di cual 3 luna ta condicional cu 3 aña di prueba. Hues a sigui bisa cu pa loke ta e articulonan cu a keda confisca, e cellular den cual cu a haya e potretnan y videonan di arma lo keda confisca. E otro cellularnan, tas y otro cosnan lo wordo debolbe. Hues a bisa cu e droganan no lo wordo debolbe y tampoco e cosnan pa usa droga.
