Diabierna ultimo, CEDE RUBA a tene un encuentro entre centro- y organisacion di bario, fundacionnan y departamentonan di Gobierno. Despues di a firma e acuerdo cu Gobierno di Aruba pa fondonan adicional pa trabou di bario y despues di a firma e MOU cu tur centro- y organisacion di bario, CEDE ARUBA a trece mas partners hunto pa duna un presentacion di e programa BARIONAN UNICO y pa duna tur organisacion e oportunidad pa trece nan ideanan y contribucion dilanti. Un total 50 organisacion a participa na e evento aki.
E prome parti di e encuentro tabata un presentacion, duna pa Director di CEDE ARUBA, Sr. Daniel Tecklenborg. Akinan a splica cu CEDE ARUBA, a base di feedback di hopi organisacion, a amplia su rol den comunidad. Antes CEDE ARUBA a wordo mira como fondo pa financia proyecto y pa co-financia proyecto hunto cu fondonan Hulandes. Pero ultimo tempo ta hasi hopi mas cu esaki, entre otro organiza training pa hisa capacidad di organisacionnan, trece organisacion hunto pa planea y traha hunto, inicia programa y proyecto y tambe haci trabou di ‘lobby’ pa desaroyo den diferente area. Asina CEDE ARUBA a bira un catalisator pa diferente desaroyo den nos comunidad. Temanan relevante pa e siguiente ańanan ta: 1. Empodera ciudadano y iniciativa comunitario, 2. Programa di prevencion den nos comunidad, 3. Sosten na gruponan vulnerabel y 4. Sosten na organisacionnan pa bira mas fuerte y mas cerca di e necesidad den comunidad.
Den e programa BARIONAN UNICO, CEDE ARUBA lo facilita un plataforma di organisacion hopi diverso y stimula colaboracion. Punto di salida ta cu den bario ta topa tur sorto di reto: social, educacion, cultural, deportivo, economico, infrastuctura, etc. Pa yega na solucionnan, tur e sdiferente actornan aki lo mester traha mas structura cu otro. Pesey e palabra UNICO ta referi na union, colaboracion y e parti unico di cada bario, pero tambe di cada iniciativa y organisacion.
Den practica, CEDE ARUBA lo aumenta fondo operacional pa e organisacion di bario selecta, lo duna fondo adicional na proyectonan di fundacion den bario, lo duna presupuesto chikito na iniciativa di bario cu tin planes pa mehora nan bario y lo crea un programa den media pa motiva y empodera famia y bario pa tuma acionnan positivo. Banda di esaki lo duna guia y sosten na organisacion den bario, depende di nan necesidad. Lo stimula creamento di mas programa y proyecto specifico pa gruponan di riesgo, manera hoben cu no a caba scol, adultonan mayor den soledad, hende cu limitacion cu no ta participa ningun caminda y mas. Den un caso ideal, e programanan ta adapta na e necesidad di cada bario.
Despues di un presentacion cu hopi informacion, a parti tur 50 organisacion presente den 10 grupo y a duna nan den forma di un carusell e oportunidad pa trece idea y contribucion dilanti. E parti aki a wordo guia dor di mas coleganan di CEDE ARUBA. Durante e actividad aki e evento a bira hopi interactivo y energetico. Na final, cada grupo a comparti su sentimiento pa e trabou den grupo y e programa. y por conclui cu e evento y proceso tabata positivo. CEDE ARUBA y e organisacion di bario a gradici cada fundacion y departamento di Gobierno cu a participa den un forma activo. Lo traha ariba un raportahe di tur idea y reparti esaki bek bou di tur organisacion. De e siguiente simannan ta buscando personal adicional pa e centro- y organisacionnan di bario, pa asina tin mihor capacidad pa ehecuta programa y proyecto. CEDE ARUBA tambe ta formando un team chikito pa duna lidersago na e programa y pa duna e sostén necesario na tur organisacion.
Pa mas informacion tocante e programa BARIONAN UNICO, lo por tuma contacto cu CEDE ARUBA na 582-7666 of por manda un mail na barionanunico@cedearuba.org
