Aruba Excellence Foundation (A.E.F.) tabata tin e honor pa facilita e curso di Aruba Certification Program (A.C.P.) na e team completo di Dienst Burgerlijke Stand en Bevolkingsregister (Censo).


Tur cos a inicia ora cu A.E.F. tabata enbusca di personanan cu por representa y ta personifica e diferente balornan di Aruba su zjeito pa un comercial. Ora cu a toca e balor di ‘Carisma’ a bini na mente e meneer cu ta traha como security guard na entrada di Censo, ricibiendo cada persona cu hopi cariño y amabilidad y semper cordial. E palabra zjeito ta nifica cu un persona tin hopi smaak of tambe hopi pep, y esaki ta netamente e caracteristica cu meneer Harold, e security guard na Censo, ta posee cu a pone A.E.F. tuma contacto cu Censo y pidi permiso pa filma e persona aki. Na mes momento a haci uso di e oportunidad pa extende un invitacion na Directora di Censo, sra. Sharin Luydens pa henter su team di Censo participa cu e programa di certificacion A.C.P. Sra. Luydens mesora a acepta e invitacion, haciendo bon uso di e oferta di A.E.F. cu tin te cu fin di aña, esta participa y certifica gratuitamente.
A.E.F. a facilita e sesionnan aki en persona semanalmente na e team di Censo, y asina den 3 siman nan a completa e programa di certificacion.


Aunke cu e team di Censo no ta traha directamente den e industria di turismo, asina mes a wordo expresa cu a siña hopi mas detayes di Aruba su historia y demas caracteristicanan cu a pone cada un persona sinti nan mes mas orguyoso di nos isla. Ta clave pa conoce bo isla su identidad, pa compronde cu esaki ta na e raiz di nos hospitalidad. Ademas, cada un miembro di e team por a identifica nan mes cu e balornan di nos zjeito tanto den aspecto personal como tambe profesional. Brinda servicio cu zjeito, a base di e balornan cu ta destaca den Aruba su hospitalidad, ta e jabi pa ta un embahador cordial di nos isla cu lo tin un efecto positivo ariba e cliente di Censo y naturalmente ariba e bishitantenan ariba nos isla.


Algo cu sigur e team di Censo a encanta durante di e programa di certificacion ta e parti competitivo di e online quiz ‘Kahoot’ cu cada sesion tin. Ademas di esaki, entre colega a sa di comparti storianan cu otro di Aruba di antes.
A.E.F. ta felicita cada miembro di e team cu e logro di ta A.C.P. Certified y tambe danki pa e hospitalidad demostra na e facilitator cu a presenta e sesionnan.


Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.

LEAVE A REPLY

Please enter your comment!
Please enter your name here