Minister di Husticia mr. drs. Arthur Dowers a participa diahuebs atardi, na Kulture Cafe San Nicolas, na ceremonia di Bureau Integriteit Aruba (BIA), caminda diferente participante a ricibi nan certificacion despues di completa formacion pa aporta den funcionnan importante relaciona cu integridad den aparato gubernamental.
E formacionnan ta prepara empleado publico pa actua como Vertrouwenspersoon Integriteit (VPI) y Interne Onderzoeker (IO). Como persona di confiansa, nan funcion ta entre otro scucha, orienta y conseha colega den situacionnan relaciona cu posibel violacion di integridad. E investigador interno, na su turno, ta prepara pa haci investigacion independiente di echo, raporta riba asunto di integridad y brinda sosten durante e investigacionnan.
Durante e ceremonia, Minister Dowers a felicita e participantenan cu a completa nan formacion, pero na mes momento a enfatisa e responsabilidad grandi cu ta acompaña e funcionnan cu nan ta asumi.
Particularmente den caso di un persona di confiansa, Minister a señala cu confidencialidad ta fundamental. Un empleado cu acerca un persona di confiansa mester por haci esaki cu e siguridad cu informacion comparti lo ta maneha cu discrecion y conforme e reglanan aplicabel. Mantene e confiansa aki ta esencial pa credibilidad di henter e sistema.
Minister Dowers a amplia e mensahe indicando cu integridad no ta algo cu por pone solamente den man di BIA, un director, un persona di confiansa of un investigador interno.
Integridad ta un responsabilidad cu cada persona cu forma parti di aparato gubernamental mester carga. Mientras cu esnan den posicion di liderazgo tin un responsabilidad adicional pa crea e condicionnan corecto, cada empleado publico tin su propio deber pa actua corectamente y conforme regla y ley.
Dowers a señala tambe cu integridad ta hopi mas amplio cu solamente asunto financiero of posibel mal maneho di placa. E ta refleha den e manera cu empleado publico ta trata informacion confidencial, respeta privacidad di ciudadano, cumpli cu procedura y, fundamentalmente, brinda e servicio cu comunidad tin derecho di ricibi.
Pa Minister Dowers, e certificacion ta no solamente un logro personal pa e participantenan, e ta un paso adicional den construccion di un aparato publico caminda profesionalismo, responsabilidad, confidencialidad y respet ta forma parti integral di e manera di traha.
Cu e profesionalnan cu awo ta prepara pa aporta den e funcionnan aki, Bureau Integriteit Aruba ta sigui fortalece su capacidad pa promove y sostene integridad den Gobierno di Aruba.
