Diabierna mainta den Corte, Hues a sigui cu tratamento di e caso penal contra Zuriel Celaire (23). E caso a keda pospone dia 5 di Juni 2026 pa Reclasering traha un raport.
SOLO DI PUEBLO por a compronde cu Fiscal a aproba e plan di Reclasering pa cu tratamento di Zuriel. E plan ta encarga cu Zuriel ta haya tratamento bou condicion pisa, esta banchi di enkel y toque de keda anochi na cas. Fiscal a exigi 4 aña di prison y tratamento obligatorio y cu banchi electronico na enkel.
E acusacionnan contra Zuriel ta: di intento di maltrato severo, menaza cu morto y posecion di arma di candela den e periodo di 9 April 2025 y 27 September 2025. Tambe e ta wordo acusa cu riba e anochi di 9 pa10 April 2025, a choca e homber D.L. y dal’e cu arma na cabez. E mesun dia a menaza e homber D.L. cu arma. Tambe cu Zuriel a menaza un otro persona cu arma. Tambe cu riba 27 September 2025, Zuriel a menaza e ruman muher di D.L, via whatsapp.
Dia 5 Juni 2026, Hues a pospone e caso riba peticion di Fiscal, pa Reclasering haci un investigacion pa mira con lo bay haci tratamento TBS na Hulanda.
CONDICIONNAN PISA PA ZURIEL
Ta asina cu 5 Juni 2026, psycologo den Corte a mustra cu Zuriel no kier coopera pero e ta haya cu mester atrobe ordena pa Zuriel haya TBS. Fiscal a pidi conseho di Reclasering. Ayera un miembro di Reclasering a mustra cu e risico ta grandi cu Zuriel lo bolbe cay den mal caminda. Reclasering ta haya cu Zuriel mester haya tratamento psycologico, tambe trata su adiccion y cu Zuriel mester cana cu e banchi electronico na su enkel pa asina sa tur ora unda e ta.
Reclasering ta haya cu por haci e tratamento obligatorio (TBS) na Aruba pero cu condicionnan mas pisa. A splica Hues cu anterior cu tabata guia Zuriel, no por sa kico Zuriel ta haci anochi. Reclasering ta haya cu e banchi electronico y nochi di keda na cas, lo por tin mas control.
MESTER BISTI BANCHI NA ENKEL
Ta asina cu na Juni 2026, Ministerio Publico a introduci e banchi electronico na enkel. Reclasering a mustra cu Zuriel a bisa cu e no kier haya psycologo B. y tampoco psycologo d C. pasobra e no ta confia nan. Hues a hala atencion di Zuriel cu awor ta bin un psycologo y Zuriel mester sigui indicacionnan sino lo bin e TBS. Segun Zuriel e no tin problema cu esey. Reclasering a mustra cu e banchi di enkel mester ta henter dia y kier pa Zuriel bisiti esaki durante di 9 luna, cu ta e periodo piloto stipula pa Ministerio Publico.
FISCAL
Fiscal a bisa Hues cu e ta haya Zuriel culpabel di tur e acusacionnan. El a mustra cu 18 September 2025 tabatin tiramento riba auto di Zuriel door di rumannan D.L. y J.L. E dos rumannan a wordo condena y nan a haci denuncia contra Zuriel di menaza, maltrato. E anochi di 9-10 April 2025 segun D.L., a bay banda di EPB San Nicolas pa topa cu Zuriel pa un asunto droga. El a bay cu su amigo Zulu. Na e lugar, D.L. a baha y bay den e auto caminda Zuriel tabata. Den auto hunto cu Zuriel, D.L. a wordo maltrata door di un hende cara tapa sinta patras den e auto. E homber a dal D.L. cu e pistool na cu cabez y cara. Zuriel a bisa D.L. cu su ruman J.L. a faya y awor e tin cu paga. Zulu a baha for di auto y core bay. Despues di esaki, e rumannan L. a bay tira riba e auto den cual Zuriel tabata. Fiscal a bisa Hues cu e ta kere e declaracion di D.L. El a bisa cu e no ta haya proba intento di maltrato severo pero si e menaza di morto. E ta haya cu ta Zuriel a pasa e homber den auto e arma.
Fiscal a mustra cu investigacion cu Polis a haci den cellular di Zuriel, a haya potretnan di armanan di candela y Zuriel cu arma den man. E potretnan ta saca na 2025 y expertonan di Polis ta mustra cu ta armanan di candela real. Fiscal a mustra cu Zuriel a bisa cu ta potretnan AI cu el a haci pa asina mustra otronan cu e tin arma. Fiscal a bisa cu e no ta kere Zuriel, pasobra Zuriel no por a splica con el a haci e potretnan. Fiscal tambe ta haya proba cu Zuriel a manda mesahe di menaza pa ruman muher di D.L. riba 27 September 2025.
TRATAMENTO OBLIGATORIO
Fiscal a mustra cu Zuriel ta culpabel di casonan serio. Na opinion di Fiscal, Zuriel ta blo desmenti tur cos y no ta tuma responsabilidad pa su hechonan. El a mustra cu anterior Zuriel a wordo condena pa casonan similar. Fiscal a bisa cu e pregunta ta, kico mester pasa cu Zuriel pa evita cu ta bolbe haci mesun cos. El a mustra cu apesar cu Zuriel tabata nenga di coopera, psycologo y Reclasering a logra traha un raport riba Zuriel.
Fiscal ta haya cu Zuriel mester haya tratamento obligatorio y sino TBS. El a splica cu ta hopi dificil pa por manda hende Hulanda pa tratamento obligatorio den clinica. Door cu Zuriel no kier coopera, no por manda Zuriel Hulanda. Ademas si Zuriel bay Hulanda, e lo bin Aruba bek. Fiscal ta haya cu mester atende cu Zuriel na Aruba mes. El a mustra cu Reclasering a bin cu conseho caminda bou condicionnan pisa y cu banchi na enkel, Zuriel lo por haya tratamento. Psycologo y Reclasering ta haya cu e risico ta grandi cu Zuriel ta bolbe cay den e mal caminda.
EXIGI 4 AÑA DI PRISON Y TRATAMENTO
Fiscal ta aproba e proposicion di tratamento obligatorio na Aruba mes cu condicionnan pisa. Fiscal ta haya cu Zuriel mester haya castigo di prison tambe. El a exigi 4 aña di prison y despues ta sigui cu e tratamento. Por a mira cu Zuriel tabata sacudi cabez cu e no ta di acuerdo. El a hasta cuminsa yora.
ABOGADO
Abogado mr. S.Tromp hunto cu mr. J.Tromp a bisa Hues cu nan no ta haya cu tin prueba contra Zuriel. Segun e abogadonan, Zuriel a bisa cu ta e rumannan L. a traha un plan pa Zuriel ta sera den KIA pa asina por tuma represaya contra dje. E abogadonan ta haya cu e homber D.L. ta gaña cu el a topa cu Zuriel pa un deal di marihuana. Zuriel ta desmenti esaki total. No tin ningun prueba. E abogadonan ta haya cu e declaracion di Zulu, e amigo di D.L., no ta confiabel. Nan a remarca tambe cu e declaracion di e mama di D.L., kende a bisa cu el a mira rascanan riba cara di su yiu, no ta confiabel. Na opinion di e abogadonan, e stem di mensahe cu a wordo manda pa e ruman muher di D.L., no ta Zuriel y no por wordo usa como prueba. Nan ta haya cu no tin suficiente prueba. Segun e abogadonan, e pruebanan cu Fiscal ta presenta, no ta sostene otro. E abogadonan a bisa tambe cu no tin prueba cu Zuriel ta complice di e maltrato di D.L. den e auto di Zuriel. Segun e abogadonan, Zuriel no tabata sa cu e persona patras den auto tabatin arma. E abogadonan ta haya cu mester declara Zuriel liber.
Tambe e abogadonan ta haya cu no tin suficiente prueba cu Zuriel tabata den posecion di arma. E potretnan di arma den su cellular ta fake. Ta via computer el a traha esakinan. Nan ta haya cu sin un investigacion fisico, no por bisa cu e armanan ta real.
Hues a remarca cu segun e ley di arma, si tin algo parecido na un arma cu por wordo usa pa spanta y amenaza, e ta wordo considera como un arma.
E abogadonan no ta haya cu mester pone Zuriel bou TBS. Nan ta haya e castigo exigi pa Fiscal demasiado halto y mas ainda pa pone banchi di enkel. Nan no ta di acuerdo pa pone e orario cu entre 6 pm y 6 am Zuriel mester ta na cas. Tambe nan ta contra pa Zuriel bisti e banchi na enkel pa 9 luna largo. Nan a bisa Hues cu lo ta mihor cu despues 1 luna lo mester evalua e uso di banchi di enkel.
Hues a sera tratamento di e caso y a bisa cu dia 18 September 2026 lo tin sentencia.
