Cft tin bastante tempo ta expresa su preocupacionnan tocante di e hecho cu e ingresonan di Sint Maarten no ta alcansa e nivel anticipa, loke ta significa cu e pais tin recursonan propio limita pa gastonan publico importante. Cu e adopcion di e modificacion presupuestario 2024 y e conseho positivo corespondiente emiti pa Cft, Sint Maarten por contrata un prestamo pa inversionnan.
Presupuesto pa 2024 y 2025
Cu e adopcion di e modificacion presupuestario 2024 y e conseho positivo emiti pa Cft, Sint Maarten awor por contrata un prestamo pa e construccion di un prizon nobo, generadornan pa GEBE y un edificio nobo pa e Mental Health Foundation. Ademas, Sint Maarten ta trahando duro pa completa e presupuesto pa 2025. Pa prome biaha desde 2010, ta posibel pa Sint Maarten adopta e prepuesto prome cu e aña nobo ta cuminsa, loke ta significa cu e pais ta dunando pasonan significante den e mehoracion di e prosperidad di su ciudadanonan y di finanzas gubernamental.
Aumento di ingresonan
E sistema di impuesto di Sint Maarten ta anticua y e Servicio di Impuesto tin problema di implementacion. Debi na esaki, e ingresonan di impuesto ta menos compara cu otro paisnan den Reino. Consecuentemente, Sint Maarten ta perde ingresonan substancial y e pais no tin suficiente recurso propio pa inversionnan importante. P’esey, Cft ta bolbe enfatisa e importancia di modernisa tanto e sistema di impuesto como e Servicio di Impuesto. Recientemente a inicia un trayecto di reforma pa Servicio di Impuesto.
E hecho cu un instancia so lo cobra impuesto y prima tambe lo conduci na un cobransa mas eficiente i na mas ingreso. Banda di esey, tin mas opcion pa aumenta e ingresonan, manera e introduccion di un impuesto riba turismo, e reforma di e impuesto riba alohamento y e introduccion di un seguro medico general. Cft ta urgi pa implementa e plannan aki mas pronto posibel pa asina genera mas ingreso i ta mira ku mientras tantu ta dal e prome pasonan pa logra esaki.
Clima y energia
Durante su bishita, e delegacion di Cft a bishita varios entidad cu ta traha riba e area di clima y energia. Proyectonan pa procesamento di residuo mas sostenibel y e realisacion di un instalacion pa procesamento di awa residual tawata e enfoke central. Banda di esey, e delegacion di Cft a bishita GEBE, caminda a papia di e situacion financiero di e empresa, energia renovabel y inversionnan sostenibel. Durante un bishita na Nature Foundation Sint Maarten a papia di e importancia di preservacion di naturaleza y e falta di recursonan actualmente disponibel. E motibo principal pa e bishitanan aki tawata pa evalua e impacto di e iniciativanan aki riba e presupuesto multianual di e pais.
