Diabierna Hues ta dicta sentencia den caso di homber cu a chantagea 3 dama y hasta a viola un dama
ORANJESTAD – Diabierna 24 April 2026 mainta, Hues di Corte di Husticia ta dicta sentencia den e caso penal cu Ministerio Publico a cuminsa contra e homber D.E(29).
SOLO DI PUEBLO por a compronde cu luna pasa tratamento di e caso a tuma lugar, caminda Fiscal a haya D.E. culpabel y a exigi 5 aña di prison.
ACUSACIONNAN
E acusacionnan cu Fiscal a presenta contra D.E. ta:
** Na Juni 2014, D.E. a viola e dama S., kende e tempo ey tabatin 17 aña. Ademas S. tabata victima di “hack” y chantage di D.E.
** Entre Januari 2015 y 11 Januari 2023, D.E. a hack y chantagea e damanan B. y T.
NO COMPLETO RESPONSABEL
Psycologo y Psychiater a wordo scucha e dia ey den Corte, caminda nan ta haya cu D.E. tin problema mental y cu e mester haya tratamento na Respaldo. Nan ta haya cu D.E. ta menos responsabel pa su actonan.
DEMANDA DI DAÑO
Ta asina cu e dama S. na Hulanda, a demanda 28.674 florin na daño material pa tur e tratamento cu e mester a sigui na Hulanda. Tambe el a demanda 84 mil florin di daño material door cu el a keda afecto y awor mester haci 1 aña extra di su estudio na Hulanda.
E dama T. a demanda 57.790 florin na daño material cu ta encera entre otro tur e tratamento cu e ta hayando.
FISCAL A EXIGI 5 AÑA DI PRISON
Fiscal a bisa Hues cu e victimanan a sufri pa hopi tempo door di D.E. y nan a keda afecta. El a sigui bisa cu e acusado tambe mester haya tratamento pa su problema mental. Fiscal a cuestiona e forma con D.E. tabata hack y forza e victimanan pa manda protet sino e lo publica potretnan di nan riba media.
Fiscal a remarca cu apesar cu e victimanan tabata roga D.E. pa stop, e no tabata haci caso. Fiscal a tuma D.E. na malo pa su actitud. Fiscal a bisa cu pa cu e castigo, e ta tene cuenta cu psycologo y psychiater cu ta bisa cu D.E. ta menos responsabel pa su actonan door di su problema mental. Fiscal ta haya cu mirando e seriedad di e caso, no tin espacio pa castigo combina pa asina D.E. haya tratamento. Fiscal a bisa cu ora D.E. sali liber di KIA, e por sigui tratamento. Fiscal a exigi 5 aña di prison pa D.E. Subsidiario Fiscal a bisa cu si Hues ta haya cu castigo combina lo ta na su lugar, por pone e tempo di prueba te 10 aña. Fiscal a aproba e demanda di daño di e dama S.
CASTIGO TA MUCHO HALTO
Abogado di D.E., m.r. Illes a bisa Hues cu e ta haya e exigencia di Fiscal mucho halto. E abogado a bisa cu Fiscal no a tene cuenta cu e situacion mental di D.E., manera psycologo y psychiater ta mustra.
E abogado a bisa cu D.E. a bisa Hues cu e tabatin relacion sexual cu e dama S. y cu esaki tabata cu aprobacion di S. E abogado ta haya cu no tin prueba di violacion y mester declara D.E. liber y cu e demanda di daño di e dama S., mester wordo poni un banda. E abogado ta haya cu e demanda di S. ta asina compleho pa wordo trata den un caso penal. E ta haya un caso civil na su lugar.
E abogado a bisa cu D.E. ta admiti di a haci malo y mester haya castigo. Na opinion di e abogado, Hues mester tene cuenta cu raport di psycologo y pshychiater kendenan ta mustra cu D.E. e ta menos responsabel pa loke el a haci. Mr. Illes a bisa Hues cu den KIA, D.E. ta bou vigilancia special pa no mata curpa. Na opinion di mr. Illes, castigo di prison ta haci cu D.E. no por haci nada, pero tratamento ta trece cambio den su comportacion.
Hues a bisa cu e mester mas tempo pa studia e caso. El a bisa cu Diabierna awor 24 April 2026, e lo sera tratamento di e caso y di biaha lo tin sentencia.
