Tur cos a cuminsa ora cu Juan Francisco tabata tin 14 aña, el a haya un type machine for di su wela regaldo pa su cumpleaños. Su prome storia cu el a skirbi tabata Hubentud cu despues di 25 aña el hacie den un serie di television bao di e nomber di Ciudad Oraño. Cu 17 aña Juan Francisco a skirbi un buki pa mucha ‘E solo di e Caquetionan’ cu a keda publica na 1997. Ta hopi ta e storianan y scriptnan di pelicula cu Juan Francisco tin skirbi cu ainda tin cu wordo ehecuta.
Riba 5 di Febriuari di 1997 Juan Francisco a cuminsa traha na ATV canal 15 den e departamento di master control. Durante 2 aña Juan Francisco a pasa pa diferente departamento y te hasta na dirigi e noticia. Di production control el a bay pa editing unda e tabata e editor di noticia.
Na 1999 Juan Francisco a bay studia direccion cinematografica y realisacion audiovisual na Madrid, Spaña. Despues cu el gradua na Spaña el a bay studia diseño di media na Hulanda. Na banda skirbi, produci y dirigi pelicula, Juan Francisco tambe por haci e diseño y marketing di e pelicula. Ora cu el a finalisa su estudio na Hulanda el a regresa Aruba.
Na Aruba Juan Francisco a dicidi di funda CINEARUBA pa por stimula un industria di cine local.
Varios tabata e peliculanan cu el a skirbi, produci y dirigi cu a ricibi reconocemento internacional e.o. 10 Ave Maria, Awa Brak, Alto Vista y Abo So. Cu CINEARUBA Juan Francisco a realisa diferente proyectonan cu a beneficia e comunidad di Aruba y principalmente e hobennan. Proyectonan manera: Tribi Soña, Biba Cultura, Into Acting Youth Club, Shoot 2 Capture, Shortcutz Aruba, Rooftop Film Club, Ciudad Oraño, Youth Can, On Air Drama, Cinema Outdoor, Street Rap Musical, Summer Movie Nights, Kids Report, The 48 Hour Film Project Aruba, Playa Film Festival y un cantidad di tayernan di cine y television e.o. scriptwriting, produccion, lenguahe audiovisual, actuacion y direccion.
Pa Juan Francisco, importante ta e traspaso di conocimento y yuda e hobennan desaroya nan talento. Ora e mes tabata hoben e no tabata tin un caminda cu e por a bay pa explora su talento. Pa e motibo ey e kier brinda na e hobennan e oportunidad ey, pa medio di provee un plataforma unda cu e hobennan por explora y desaroya nan talento.
Juan Francisco Pardo ta spera di por sigui contribui na e desaroyo di Aruba su talentonan local. E tin 30 aña combinado media cu arte, cultura y social, conectando tur cos cu otro na beneficio di e desaroyo di comunidad di Aruba.
