Despues cu e aliadonan di AVP, Patrick y Speed a lastra un comerciante latino, e comerciante a reacciona:
Den un di e programanan di Radio Rochela conduci pa e duo politico Andrade y Paskel, nan a lansa atakenan fuerte contra di un comerciante latino cu tin su Beauty Salon na Aruba pa hopi aña.
Durante 30 minuut, nan a keda trece tur sorto di ponencia dilanti, cu awor a bin sali na cla cu ta mentira, chisme y redo.
E atakenan ta cu Clyde lo ta pelukero di Minister Xiomara Maduro y cu pa e motibo ey lo a pidi of haya trato preferencial pa permiso di Dimas.
Tambe a bini alegacion cu a manda baha un sobrina di Clyde for di avion, ora e tabata cla pa wordo deporta tempo di Andin Bikker. Tur e storianan aki ta mentira!
Reaccion di Clyde: Clyde kende tin 57 aña di edad, y 30 aña bibando y trahando na Aruba no a sinti pa keda keto. E criticanan tabata hopi pisa y infunda y nunca di su bida el’a pasa den algo asina, unda e ta wordo malamente critica y lastra, sin haci nada robes.
Ta obvio cu e duo politico ta pasa nan dianan ta busca tur chisme pa ataka gobierno. Esey tambe kisas te proposito, pasobra tesey e duo politico ta haci henter dia: ataka gobierno cu hopi odio!
Clyde No a pidi favor politico;
Clyde a bisa bon cla, cu e no a pidi fabor politico. E tin un sobrino di dje, cual el’a procesa tur su papelnan y na forma legal, e ta tramitando su permiso.
Pelukero di Minister Xiomara:
Clyde a bisa cu e no tin color politico y tur persona por yega serca dje y el lo duna tur servicio. Por ta Minister Xiomara, por ta cualke otro ministro, politico, e ta traha pa tur. Hasta esposa di Patrick Paskel y esposa di Speed a acudi y a haya nan servicio. Pues, no ta mira e rason pa hinca Minister den e asunto. Den pasado el’a traha pa Minister di AVP tambe.
Lekmento di documento:
Clyde ta puntra: di unda a sali? Cu tur su documentonan ta riba caya y den man di Patrick Paskel? No tin nada robes den e documentonan. Pero cu ki motibo Patrick tin copia di su documentacionann? Cathy Paskel na Dimas of Kramers na Warda nos Costa por tin e documentonan y dicon nan ta den man di Patrick?
E duo periodista ta grita mescos cu porco:
Mas leu Clyde a expresa su mes, cu e dos supuesto periodistanan ta grita manera porco den nan programa radial, y lansa tur sorto di atake riba hende, inhustamente, sin base. E ta contesta bek, pasobra e no tin miedo y no ta haciendo malo. Ademas e ta bisa cu e duo ta chismoso, pasobra e forma con nan ta grita “pelukero di Mon Plaisire”, ta gritonan cu ta irita hende su horea.
E realidad ta cu e ta procesando un permiso pa su sobrino pa cual e ta cumpliendo cu ley y manera el’a haci pa su otro trahadornan kendenan tambe tin permiso.
Clyde a bisa cu e lo evalua cu su abogado si e lo tuma paso contra di e agresion contra su persona y su compania.
Solo di Pueblo ta asombra pa mira con e dos aliadonan di AVP, a bay over na maltrata y rebaha un Latino ne forma aki, tur pa lanta odio, den nan deseperacion pa purba caba cu e coalicion actual.
Por mira e reaccion di Clyde AKI, via Noticia Impacto.
https://www.facebook.com/noticiaimpactoaruba/videos/2005497806285312/
