Menos di un siman despues di e  exitoso careda Urataka Run & Walk 2023, orguyosamente Caribean  Mercantile Bank N.V. (CMB), como patrocinador oficial, a haci entrega di  donacion na dos (2) instancia di e comunidad di Santa Cruz y un (1)  grupo di boluntario activo. Ta trata di Stichting Ambiente Feliz, Grupo  Maria Auxiliadora – Het Arubaanse Padvindsters Gilde, y Volunteer Motor  Unit Aruba. 

Loke ta un tradicion deportivo masha spera den e prome dianan di  januari, Urataka Run & Walk a nace 25 aña pasa cu e fin di fomenta  movecion fisico y pa contribui na comunidad. Pa ambos motibo CMB ta  hopi contento di por forma parti di dje sosteniendo e organisacion, loke na  su luga ta yuda pa mas fondo ta bay bek caminda tin mas mester di dje. 

Diabierna 20 di januari a tuma luga na sede di CMB na Caya G.F. Betico  Croes e momento pa entrega di donacion. Esaki tabata den man di  representantenan di gerencia, Sr. Roberto Dijkhoff, Sra. Natalie de Cuba,  y Sr. Gavril Mansur. Cada instancia di bario di Santa Cruz a ricibi un suma  di cinco mil florin. 

E prome tabata Stichting Ambiente Feliz, un organisacion cu ta existi pa  mas di 35 aña. Ta trata directamente cu persona cu limitacion fisico y  mental y nan famia, elevando nan calidad di bida y fomentando un trato  husto y cu respet den nos comunidad. Entre e facilidadnan di Santa Cruz  y San Nicolas, Ambiente Feliz ta un resguardo vital pa mas menos 24  cliente. 

Siguientemente a ricibi representantenan di Grupo Maria Auxiliadora –  Het Arubaanse Padvindsters Gilde. Esaki ta un grupo di scout pa mucha  muhe cu a lanta diez aña pasa, e unico den Santa Cruz, cu e meta di  empodera y desaroya mucha muhe como miembro balioso di comunidad.  Actualmente ta conta cu 24 scout activo, ademas di cuarenta otro  miembro. 

Por ultimo, pero sigur no menos relevante tabata esunnan di Volunteer  Motor Unit Aruba (VMUA). Esaki ta otro grupo cu tin diez aña di existencia  y ta brinda un contribucion importante na comunidad. VMUA ta consisti di 

mas of menoos 20 miembro cu semanalmente ta pone nan tempo y  motorcycle disponibel pa duna un nivel adicional di siguridad na careda y  otro eventonan rond di e isla bou guia di Cuerpo Policial di Aruba.   

CMB ta gradici organisadornan di Urataka Run & Walk pa permiti e  colaboracion fructifero aki specialmente na e Stichting Ambiente Feliz,  Grupo Maria Auxiliadora y Volunteer Motor Unit Aruba ya cu a traves di  nan vocacion pa sirbi prohimo, nan ta un ehempel pa tur otro ciudadano.  Hopi exito den futuro.

LEAVE A REPLY

Please enter your comment!
Please enter your name here