Comision di Economia Informal di Camara di Comercio y Industria di Aruba (KvK) a presenta e progreso alcanza y diferente iniciativa cu ta den preparacion, cu e meta di yuda empresarionan cu actualmente ta opera informalmente pa integra den economia formal di Aruba.

Actualmente, ta calcula cu economia informal di Aruba ta representa aproximadamente 19 porciento di Producto Interno Bruto (PIB), equivalente na cerca di Afl. 1,4 biyon. E situacion aki ta ocasiona, segun estimacion, un perdida anual di Afl. 340 miyon den entrada pa gobierno, ta crea competencia desleal pa empresanan registra y ta laga trahadornan informal sin proteccion laboral y social esencial.

Pa enfrenta e desafionan aki, e comision a lansa un strategia di colaboracion cu ta busca aumenta conocemento tocante beneficionan di formalisacion, aclara malentendidonan relaciona cu belasting y ofrece acompañamento practico na empresarionan local.

Progreso y resultadonan alcanza te awor

Plan strategico y plan di accion

E comision a desaroya un plan di accion amplio, enfoca riba concientisacion, educacion y acompañamento durante e proceso di registracion formal.

E meta ta amplia e base di contribuyentenan mediante incentivonan y sosten, en bes di depende solamente di presion mediante control y sancion.

Colaboracion cu institucionnan publico y priva

E comision a manda cartanan oficial cu un plan di formalisation na diferente institucionnan importante, incluyendo Departamento di Asuntonan Economico, Comercio y Industria (DEZHI), Departamento di Impuesto (DIMP), Departamento di Labor (DAO), Departamento di Integracion, Maneho y Admision di Stranheronan (DIMAS), Sociale Verzekeringsbank (SVb Aruba), Qredits Aruba y banconan local (ABA).

Tambe a inclui organisacionnan empresarial manera AHATA, ATIA, CUA, AFBA y AVA, ademas di medionan di comunicacion y oficinanan di asesoria huridico y contabilidad.

Campaña educativo mediante vodcast y media

E comision ta preparando un serie di vodcast educativo cu lo presenta experiencianan exitoso di empresarionan, splicacion di beneficionan fiscal y contenido pa redes sociales cu ta aclara malentendidonan tocante impuesto. Un di e preguntanan central ta si un empresario realmente lo mester paga mas belasting despues di formalisa su negoshi. Tambe lo presenta un campaña di video cu ta compara diferente forma huridico di empresa, particularmente VBA y Eenmanszaak, cu enfasis riba proteccion di patrimonio personal.

Iniciativanan cu ta den preparacion

Guia practico pa formalisacion

E comision ta preparando un manual titula Path to Formalization, cu lo splica paso pa paso con empresarionan por habri un cuenta bancario, registra na DIMP y DEZHI, inscribi na SVb y sistema di pension, y organisa nan contabilidad basico.

Workshops y asistencia personal

Lo organisa workshops interactivo cu asistencia digital y presencial pa facilita registracion di empresa y cumplimiento di obligacionnan administrativo despues di formalisacion.

Competencia husto y control di mercado

E comision ta busca colaboracion cu autoridadnan di control pa promove inspeccionnan husto den sectornan cu actividad informal, incluyendo benta online sin registracion, tournan informal, huurmento di propiedad pa estadia cortico sin permiso y construccion cu pago cash.

Paralelamente, lo promove uzo di pago electronico mediante colaboracion cu banconan local.

Un economia mas inclusivo y resistente

Comision di Economia Informal di KvK ta enfoca riba crea un economia mas transparente, inclusivo y resistente, ofreciendo empresarionan chikito oportunidad pa formalisa nan actividadnan, fortalece nan posicion comercial y contribui na desaroyo economico sostenibel di Aruba.