Comite Olimpico Arubano lo inaugura nan edificio nobo cu presencia di Presidente di IOC, sr. Thomas Bach.
Diasabra awor lo ta un dia historico pa Comite Olimpico Arubano(COA) mirando cu un berdadero soño lo bira un realidad. Semper COA tabata anhela pa tin su mesun cas di deporte na Aruba. Pa hopi aña COA tabata situa den stadion Guillermo P. Trinidad den dos oficina chikito cual espacio no tabata grandi, mirando tur e profesionalnan den servicio. Segun añanan a transcuri, e famia di COA a sigui crece y mester a busca un espacio mas grandi. A haci varios sondeo den pasado pero sin mucho exito. Durante añanan a keda persevera te cu a logra pa esaki awe a bira un hecho.
Cu hopi orguyo por anuncia cu diasabra awor 11 di maart durante un Festival Deportivo por fin Comite Olimpico Arubano por estrena e cas di deporte na Aruba. Pa e motibo aki tambe COA kier a invita tur atleta y ex-atleta Olimpico y nan famia, coach y dirigente nan deportivo, nos federacion nan deportivo, amantenan di deporte, bisiñanan den e bario di Playa y henter e pueblo di Aruba pa bin presencia un momento unico pa e deporte na Aruba. Loke lo hasi e diasabra uno mas special ainda ta cu na e apertura di e oficina di COA lo ta presente nada mas y nada menos cu e Presidente di Comite Olimpico Internacional, Thomas Bach, hunto cu e Presidente di Panam Sports, Neven Ilic y un delegacion di comite di ehecutivonan di IOC, Panam Sports y Olympic Solidarity hunto cu nos dignitario nan di Aruba.
Di 9or di mainta pa 12or di merdia, lo bay tin demostracion di algun di nos deportenan Olimpico y e deporte nan mas popular na Aruba. Tambe lo tey Archivo Nacional cu e historia di deporte na Aruba. Den e parti oficial lo corta sinta y lo canta e Himno Olimpico y e tono glorioso Aruba Dushi Tera. Lo bay tin baile di Popcorn Dancers y mas sorpresa cu no por divulga ainda. E marca oficial di Comite Olimpico Arubano y su delegacion deportivo, Totto di Colombia lo tin un tent unda nan lo expone e uniform nan di ultimo modelo pa loke ta e ciclo Olimpico aki. E mural di e artista Paul Wong tambe lo haya su debido atencion mescos tambe e parti interior di e edificio di COA cu a keda masha bunita mes.
Excelencia Catering lo percura pa ofrece snacks y pasa boca tipico como tambe coy bebe na prijs di famia.
Yega diasabra awor na e oficina di COA situa na Vondellaan 27(bandi Banco di Caribe y enfrente di veld di Cricket) y bin celebra e momento historico aki.
