Cu demostracion di nos atletanan local den e Festival di Deporte, Comite Olimpico Arubano a inaugura e cas di deporte na Aruba. Manera a wordo bisa na diferente ocasion, un soño di hopi a bira un realidad awe. E mainta a habri cu un demostracion di 9 deporte rond di henter e area di e oficina di COA. Un cantidad grandi personanan den e mundo di deporte a bini hunto na e ocasion aki como tambe nos dignitarionan. Na yegada di Presidente di ICO, Thomas Bach, Presidente di Panam Sports, Neven Ilic y e Comite di Ehecutivonan, nos atleta y coach nan a haya e oportunidad di intercambia palabra cu Thomas Bach. Mas cu claro tabata tin un momento di potret cu sr. Bach.
Despues a inicia cu e parti oficial di e apertura di e oficina. Diferente persona a hiba palabra na e ocasion aki. Tur a mustra nan orguyo cu e cas di deporte na Aruba.
Por ultimo, sr. Bach, sr. Ilic y sra. Broeksema a corta e sinta y asina e oficina di COA a keda inaugura oficialmente. Paden henter e delegacion a haya un tour di e oficina cu a keda impresionante.
Un pabien na COA y Aruba completo pa cu un dia cu lo drenta den e buki di historia di e deporte Arubano.
