Tur hende mester tin compromiso cu Dios, pa asina ricibi guia di Dios den nan bida.
Con nos ta yega na un compromiso cu Dios? Awel na prome lugar nos mester entrega nos bida na Cristo Hesus, no tin otro manera pa yega serca Dios, Cristo Hesus ta e unico Mediador entre Dios y hende, E ta e caminda E berdad y bida.
Un compromiso cu Dios ta necesario pa nos crecemento spiritual, pasobra tur nos asunto cu Dios ta personal, salbacion ta personal, bendicion ta personal, sabiduria ta personal, asina ta keda demostra cu un bon relacion cu Dios ta sumamente necesario den nos bida.
Nos compromiso cu Dios ta wordo alimenta door di Oracion, Lesamento di e Palabra di Dios, ayuno, bishitamento di cas di Dios, medita den e palabra di Dios y no aparta for di Su palabra den nos bida, y asina nos lo tin exito y tur cos lo bay nos bon.
Tur hende ta biba y expresa nan mes segun e compromiso cu nan tin cu Dios, nan ta balora nan relacion cu Dios. Ora nos compromiso cu Dios ta fuerte y real bo ta ripara cu no ta facil bo ta desvia for di palabra, mandato y principionan di Dios.
Ora bo tin compromiso cu Dios, e temor di Dios ta resalta tur momento den bo bida, y cosnan carnal tin cu hala un banda pasobra bo compromiso cu Dios ta sobresali.
Den Genesis 39:7-12 Jose a demostra cu compromiso cu Dios, su temor di Dios y su Lealtad na Potifar, e a prefera di corre bay prome di cay den inmoralidad.
Compromiso cu Dios, ta haci hende serio y confiabel, fiel y firme den asuntonan di nan bida, cual ta nan ta prefera di keda bon cu Dios y aparta for di cosnan di maldad.
Job tabatin compromiso cu Dios y no cu rikesa, ora e diabel a ataca Job y a kere cu Job ta adora rikesa, Job a demostra su compromiso cu Dios, y door di esey Dios a dune dobbel di locual cu e tabatin.
Hesus tabatin un compromiso cu su Tata, door di demostra cu ta Su Tata a mande, y E no ta riba su mes, E a bisa semper cu Mi ta haci locual cu Esun cu mandami.Na e momento cu Hesus a lanta Lazaro for di morto e a bolbe ripiti esey den Juan 11:41-42 pa tur hende por sa cu e ta haci locual su Tata a mande haci, pasobra e compromiso tabata cu su Tata.
Tur mayor mester tin un compromiso cu Dios y cu nan yuinan, pasobra yuinan ya un regalo di Dios, y como mayor e compromiso ta: Pa lanta nan den caminda di Senjor, pasobra ora esey no wordo haci, nos lo tin consecuencia serio, e diferencia lo wordo nota, ora un mucha lanta cu Dios, y ora un mucha lanta pa su mes kier. Pasobra e no a hanja instruccion serca su mayornan.
Compromiso cu Dios ta habri tur porta, compromiso cu Dios ta kibra kadena den nos bida, compromiso cu Dios ta pone nos aparta for di maldad.
Hende cu tin compromiso cu Dios ta aparta for di adulterio.
Hende cu tin compromiso cu Dios, no ta haci redo y perhudica otro.
Hende cu tin compromiso cu Dios ta stima nan prohimo y ta yuda nan prohimo.
Hende cu tin compromiso cu Dios ta respeta, tur momento.
Hende cu tin compromiso cu Dios, ta decente,respetuoso y integro.
Laga nos balora nos compromiso cu Dios, laga nos demostra seriedad, y hopi temor di Dios.
Sinceramente, Pastor Marcel Balootje
