Broken asphalt and debris from some street repair work.

Den e articulo aki nos lo enfoca riba “Desperdicio di Construccion”. Kico esaki ta encera? Unda por entrega esaki? Kico ta e impacto riba e prijs pa procesa Desperdicio di Construccion? Y cua ta e metodo con esaki ta wordo procesa pa recupera recursonan.  

Kico ta Desperdicio di Construccion?
Desperdicio di Construccion ta desperdicio cu ta wordo acumula for di sitio di construccion of demolicion. Ehempelnan di esaki ta entre otro: cement / beton, bloki, tegel, panchi, piedra, santo, porta of bentana, palo, diferente tipo di metal, toilets, plastic, papel, etc. Cada tipo di desperdicio por wordo procesa na un forma responsabel y esaki ta locual cu nos kier motiva pa eherce. Si ta un sitio di demolicion, e prome stap ta pa constata si tin asbest presente. Si ta asina, por aserca ATCO prome cu cuminsa cu e trabow di demolicion.

Con por entrega desperdicio di construccion den bulto?
Si a constata cu no tin asbest presente, companianan por scoge pa continua na entrega nan desperdicio di construccion den un forma mixto combina. Esaki ta nifica cu no ta separa pa categoria di sushi for di e sitio di construction of demolicion. Desperdicio di construccion combina sin asbestos por entrega na Ecotech Freezone . Esaki tin su consecuencia cu tin un diferencia di prijs pa cada ton cu wordo entrega.

Con pa separa desperdicio di construccion?
Companianan cu ta scoge pa spaar placa y separa e desperdicio di construccion of demolicion por haci esaki na e siguiente forma:

Cement, bloki di cement, kalichi, santo, pavers, klinkers y basecourse por wordo entrega GRATIS na Apex pa e por wordo procesa.
Desperdicio di metal por wordo entrega na Daltra NV of na ICR Services y ta ricibi placa pa entrega esaki.
Desperdicio organico di mata, palo of pallet blanco por entrega na Johnsons of Ecotech Freezone.
Tur otro desperdicio cu no ta reciclabel manera wc kibra, tegels, saco di cement por wordo entrega den bulto na Ecotech Freezone cu tin un gasto

E benificio di separa e tipo di desperdicio aki ta cu como compania cu ta entrega esaki por spaar placa ora di hiba paso e desperidico ta wordo considera “limpi”. Unabes cu e desperidicio ta combina y no separa e labor pa por procesa esaki debidamente ta bira mas intensivo y esaki ta resulta den un prijs mas halto.

Pa mas informacion tocante desperdicio di construccion por bishita website www.trashtocash.org pa asina haya un bista di e Blue Print pa maneho di desperdicio.

E cambio aki ta no grandi, pero como ciudadano di e pais aki nos tin cu cuminsa cambia nos manera di anda y maneha nos mesun desperdicio. E cambio aki tin e meta principal pa nos atende cu nos problemanan cu a bin ta crece durante 70 aña y cu a causa hopi daño na nos medio ambiente. E ta un paso den e bon direccion pa asina sigura cu nos yiunan tin un futuro caminda nan por disfruta di un medio ambiente sano y cu nan ta orguyoso cu pais Aruba ta cumpli cu leynan internacional pa cu maneho responabel di desperdicio.

LEAVE A REPLY

Please enter your comment!
Please enter your name here