Tienda di Educacion Aruba (TdE) en conexion cu dia Internacional di Famia, como tambe su celebracion di 13 aña di existencia den e comunidad di Aruba, tin e grato honor di invitabo pa nos prome Conferencia di Famia bou di e tema “Di Generacion Pa Generacion”.
Como e unico organisacion cu un liña di telefon pa mayor y educador (161, Gratis) na Aruba y den Caribe, TdE Aruba su punto di operacion vocal ta basa riba articulo 18, di e derecho di mucha.
E articulo ta pone enfasis riba e desaroyo y educacion di e muchanan y e responsabilidad di e mayor of voogd legal. Tienda di Educacion ta sali for di e punto di bista (vision) cu cada mayor/educador tin e boluntad, habilidad y talento pa yega na solucionnan responsabel pa loke ta trata criansa di nan yiu(nan). Na e mesun momento, TdE reconociendo su balor agrega den comunidad ya caba pa 13 aña consecutivo, ta sigui cu su compromiso na brinda comunidad 7 diferente servicio pa asina yuda cada mayor/voogd y educador den e lantamento y criansa di mucha y hoben aki na Aruba.
Basa riba e vision y articulo ariba menciona, e conferencia aki ta pa mayornan, educadornan y tur otro personanan cu di un manera of otro, directamente of inderectamente, ta contribui na e educacion y criansa di mucha y hoben entre 0- 18 aña aki na Aruba. E conferencia di famia tin como meta pa informa y educa tur presente riba temanan di importancia den e desaroyo y crecemento di mucha y hoben, como entre otro, comprende e balor di un famia funcional, e prome 1000 dianan di un mucha, e etapa di desaroyo psicosocial como tambe e impacto di trauma y estilonan di criansa.
E conferencia aki lo tuma lugar:
Fecha: 17 di Mei 2025,
Ora: 9.00 am-12.30 pm
Lugar: Universidad di Aruba
Prijs: Awg. 35, –
E conferencia aki ta conta cu varios profesionalnan cu lo sa di hiba palabra y carga e topiconan ariba menciona.
E profesionalnan cu ta encarga cu e topiconan ariba menciona ta Luz-neyla Tromp, BSc, fundado y directora di Positive Mind Guidance & Counseling como tambe miembro di directiva di TdE. Nos lo tin Sra. Clementia Eugene, PhD, lector na Universidad di Aruba como tambe un persona cu conocemento y experencia extenso den e ramo di abuso di mucha, y balor di famia funcional. Sigui pa Sra. Antoniette Geerman, MSc, GZ-Psycholoog na Psyed Aruba y como tambe Nichole Kock, Opvoedondersteuner na Tienda di Educacion Aruba. E mainta aki lo wordo guia door di Jonathan Trinidad, MBA, lector na Universidad di Aruba y miembro di directiva di TdE.
Sigur un conferencia cu lo sa di aporta di un manera positivo na e conocemento y cualidadnan di cada persona cu lo tey presente.
Bin conoce un poco mas riba crecemento y desaroyo di mucha y hoben como tambe bo contribucion como mayor, voogd y/of educador.
Si tin interes den tickets di e conferencia por yama libremente na oficina di Tienda di Educacion Aruba na 588-7100 of por manda un email na info@tdearuba.com y nos lo duna instruccion con abo lo por cumpra bo ticket.
Tienda di Educacion Aruba,
Aportando pa 13 aña na duna conseho, guia y sosten den educacion y criansa di bo yiu!
