Recientemente por a nota cu Minister Gerlien Croes a haci insinuacion den medionan social, cu fundacion Futura a haya 14.5 miyon euro pa proyecto di innovacion, y cu e no ta mira na unda e placa a bay. Lamentablemente tin un parlamentario cu a bay su tras, treciendo tambe insinuacionnan den medionan social riba esaki.
Parlamentario Evelyn Wever-Croes cu tabata e minister encarga cu innovacion durante gobernacion di Gabinete Wever-Croes ta lamenta cu tanto e minister ni e parlamentario no a tuma nan tempo pa haci nan “huiswerk” prome di acudi na medionan social cu insinuacionnan incorecto.
Pa corehi e “blunder” aki, durante un conferencia di prensa, Parlamentario Wever-Croes a duna un splicacion, indicando cu e 14.5 miyon euro ta un contract cu pais Aruba a firma cu Union Europeo na 2024 y e placa a cuminsa drenta apenas e aña aki, y den tranchenan chikito. Pa por sigui haya e placa, parti di e proyecto mester ta cla, pues no ta asina cu Aruba a haya full e placa caba. Ademas ora e placa yega Aruba, e no lo bay directamente pa fundacion Futura sino e ta bay pa Gobierno di Aruba y den e caso aki pa Minister Gerlien Croes cu ta e minister di innovacion actual.
“P’esey ta importante pa mi corehi Minister Gerlien Croes riba su insinuacionnan haci den medionan social. E no ta bon pa como mandatario di e pais aki bo ta atacha integridad di nos hobennan profesional. P’esey prome cu trece insinuacionan den medionan social, porfabor haci bo huiswerk prome” Parlamentario Wever-Croes a expresa.
