Ta masha peligroso, ora hende ta pone confiansa den hende y aleha nan curason for di Dios.
Pasobra palabra di Dios ta bisa lo siguiente: No confia den prinsnan , den yiu di hende, den kende no tin salbacion, Su spirito ta sali, e ta bolbe na tera,e mes dia ey su pensamento ta perece.( Salmo 146:3-4).
Ta miho tuma refugio den Señor, cu confia den hende, ta miho tuma refugio den Señor cu confia den prinsnan ( Salmo 118:8-9).
Bendiciona ta e hende cu confia den Señor, y kende su confiansa ta den Señor ( Jeremias 17:7).
Lo Bo warda den pas perfecto, esun cu su pensamento ta permanece den Bo. Confia den Señor pa semper, pasobra den Dios e Señor nos tin un Baranca eterno.( Isaias 26:3-4).
Y esnan cu conoce Bo nomber lo pone nan confiansa den Bo,pasobra Abo , O Señor no a bandona esnan cu ta busca Bo,( Salmo 9:10).
No tin salbacion den ningun otro: Pasobra no tin bao di cielo ningun otro nomber, cu a wordo duna na hende,pa medio di cual nos mester wordo salba.( Hechonan 4:12).
Mira na Mi y sea salba, tur e finnan di tera, pasobra Ami ta Dios y no tin ningun otro. ( Isaias 45:22).
Mundo ta yena cu distraicion, cu cos nan cu aleha hende su bista for di Dios, cosnan nan temporal, pero cu ta dañino, pa hende su relacion cu Dios, amistad cu mundo kier pretende di ta e mihor amistad, pero Dios den su inmenso amor kier recorda tur hende cu amistad cu mundo ta enemistad cu Dios,
Pasobra no tin nada den e sistema di mundo aki, cu por hiba hende na salbacion y bida eterna, esey ta locual Dios kier spierta nos di dje.
Hende ta wordo elegi door di hende, poni den posicion door di hende, pero Dios ta esun cu ta kita hende,pasobra Dios ta Soberano y e tin tur cos den su man.
Hende a elegi rey Saul, pero Dios ta esun cu a rechasa Saul pa motibo di su desobedencia, pasobra Dios conoce curason di hende, Dios ta mira locual hende no por mira.
Un cabay ta speransa falso, pa gana victoria,tampoco e no ta libra ningun hende, cu su forsa enorme.
Ata e wowo di Señor ta riba esnan cu nta tem’E, riba esnan cu ta spera riba Su misericordia,(Salmo 33:17-18).
Bin yuinan scuchami, lo mi siña boso e temor di Señor. Ta ken ta e hende cu ta desea bida, ta stima bida largo,pa e por mira bondad? Warda bo lenga di maldad, y bo lipnan di engaño. Aparta bo mes for di maldad y haci bon. Busca pas y sigui e.( Salmo 34:11-14).
Den tur cos nos mester di yudansa di Dios, ta Dios ta nos unico speransa, ta solamente den Dios nos por confia, aunke tera por sacudi, laman por lanta, biento por ta fuerte, Dios ta keda Dios, pasobra control di tur cos ta den man di Dios.
Esun cu confia den su mes curason ta un bobo, ma esun cu cana cu sabiduria lo wordo libra.( Proverbionan 28:26).
Ken cu confesa cu Hesus ta e Yiu di Dios,Dios ta permanece den dje, y e den Dios. Y nos conoce y a kere e amor cu Dios tin pa nos.Dios ta amor , y esun cu ta permanece den amor , ta permanece den Dios, y Dios ta permanece den dje.( 1 Juan 4:15-16).
Nos ta bibando den tempo trabahoso ,y peligroso, ta tempo pa nos mantene nos bista riba Dios,y solamente Dios.
Sinceramente, Pastor Marcel Balootje.
