5. E clase trahador ta pasando den duro
Falta algun dia mas pa eleccion y nos ta wak cu e situacion pa e mayoria grandi di trahadornan ta coy yora na Aruba. Tin un atake formal ariba e salario di trahadornan na Aruba dor di un parti di empresarionan na Aruba pa mantene e salario abao. No ta indexa salarionan, ora costo di bida subi. Hasta gobierno e ultimo 15 añanan tabata dejado, te cu poco dia pasa nos por a lesa cu ta bay indexa salarionan den sector publico.
Pues e trahador y su famia ta pasando den duro. Otro grupo di empresarionan ta constantemente den lucha pa hisa prijsnan di articulonan di necesidad y otro articulonan. Pesey, Costo di bida, constantemente ta subi y cada biaha e trahador mester keda sin cumpra cierto articulonan di preferencia pa e mes, pa su casa y pa su jiunan, asina e placa por yega pa cumpra e articulonan di primera necesidad. Hopi biaha apesar cu su casa tambe ta traha. Parehanan joben mester keda contento cu un apartment of un camber serca mayornan o suegronan.
E situacion ta bira pio na momento cu e trahador bay cu pensioen, pasobra e entrada ta baha considerablemente si e trahador no tin un segundo areglo di pensioen.
Esakinan ta e problemanan grandi di mayoria di e 70% di trahadornan na Aruba y cual problemanan ta grita pa solucion y ta asuntonan cu mester ser discuti cu politiconan den e campaña electoral. Nan tur ta problemanan cu tin solucion a la bista.
5.1.Salario abao di trahadornan y afiliacion na sindicato.
E solucion pa e problema aki di salario abao ta conoci. E trahadornan cu tin e problema aki, mayoria di biaha ta trata di trahadornan kendenan no ta organisa den un sindicato. E trahador afilia na un sindicato tin mihor condicionnan di Trabao y mihor salario. Pues e solucion di e problema aki ta manera nan ta bisa:
“Pensa un tiki y bo ta wak e” o na Ingles “It is written on the wall”
Sindicalismo y Politica mester por wak kico ta e solucion.
E problema grandi ta cu mayoria aplastante di trahadornan no ta den sindicato, pa asina via di un Contrato Colectivo, nan ta logra bon condicionnan di trabao. No tin cifra conoci pero un calculo ta duna cu solamente entre 4 pa 7% di tur trahadornan den sectornan no-publico tin un CAO. Tristu!! Den sector publico tin como 11 sindicato y mayoria di trahadornan ta forma parti di e clase media. Den e sector di construccion man di obra barata ofreci dor di ilegalnan ta pan di cada dia pa empresarionan den e sector aki. Hopi di nos hendenan y tambe stranheronan cu papel ta luchando pa haya trabao, ya cu nan sa nan balor di trabao, mientras e ilegal ta lucha pa su sobrevivencia, cual ta un lucha noble. Den su lucha noble pa sobrevivi e trahador aki ta pasa den hopi cataclismo. E ta un trahador vulnerabel, pasobra e no tin papel, consecuentemente e no tin derecho, e no por reclama un maltrato y semper e mester accepta e salario y trato cu nan ta ofrece. Si e reclama of haci un menasa pa ricibi un mihor trato, mesora e contesta di e sub-contratista ta ,cu ta bay yama Polis of Guarda Nos Costa, cualnan ta wordu benta den su cara. E uzo di ilegal ta haci cu e salario di e trahador den construccion ta keda abao. E ilegal mes no por yuda, ta e sistema hacie ilegal, un esclavo moderno. Hopi biaha e subcontratista di mala fe ta un stranhero cu tin papel, esta e ta legal, pero tambe tin arubiano cu ta comete e practicanan aki.
E trahador ilegal no por drenta un sindicato.
