Ministro di Energia, Glenbert Croes, a informa cu diabierna, durante e ultimo conseho di minister, e conseho a duna su bendicion pa firma un acuerdo cu Amstrong Oil and Gas pa busca gas den algun area rond Aruba.
Nan a identifica varios area rond di Aruba cu por tin gas. E area ta na Noord Oost, completamente otro caminda cu Repsol a bora den pasado.
E proyecto ta contempla un total di 3 pos di gas, mescos cu loke a wordo descurbi na La Perla na Venezuela. La Perla ta considera como descurbimento di gas mas grandi di Latino America. E veldnan di gas rond Aruba ta wordo considera di igual potencial manera La Perla.
Conseho di Minister a aproba pa CAP, compania Arubano di Petrolio, por bay e acuerdo cu Amstrong Oil. E gastonan di buskeda ta core riba cuenta di Amstrong y no riba cuenta di Aruba.
Momento cu Amstrong a ricibi informacion di Aruba y nan a cuminza haci estudionan unda a haya 3 veld di gas, nan a informa e resultado preliminar di nan hayazgo, cual a wordo ricibi como un bon noticia pa nos pais. Cu e bendicion di Conseho di Minister aki, e siguiente paso por tuma lugar, unda lo por bay un acuerdo cu Amstrong pa nan cuminza explora e 3 posnan potencial.
