Coreccion ta displina di Dios.
Un ehempel grandi di coreccion den Bijbel ta e manera con Jethro suegro di Moises a coregi Moises.
(Exodus 18:24).
Nos mester scucha pa hanja coreccion.
Nos mester ricibi coreccion cu humildad.
Nos mester scucha pa hanja direccion di Dios.
Coreccion ta un regalo.
Coreccion pa restauracion ta para scirbi den Galationan 6:1.
Coreccion pa nos ta ekipa pa bon obra ta para scirbi den 2 Timoteo 3:16-17.
Coreccion como senjal di amor ta para scirbi den Proverbionan 3:11-12.
Coreccion ta haci nos mas fuerte y sinja nos biba cu otro.( Eclesiastes 4:9-12).
Den nos bida di tur dia , especialmente cu nos yuinan, nos mester coregi y no laga e mucha crece sin direccion, pasobra un mucha cu lanta sin palabra di Dios ta un peliger pa su mes y pa otronan.
Coreccion ta cos di acepta, persona cu no ta acepta coreccion ta bobo, y e lo trompica, pasobra coreccion y disiplina ta bini di Dios.
Y esey ta notable den e tempo trabahoso den cual nos ta biba, pasobra manera ta para scirbi,
cu hopi lo desvia for di e palabra di Dios,
Hopi lo cohe nan mes caminda,
Hopi lo biba di apariencia,
Hopi lo ta rebelde, arogante, orguyoso, iresponsabel y no kier wordo coregi.
Ora un mayor ta coregi su yiu, ta un gran demostracion di amor y deber pa awor y den futuro, pasobra sin coreccion , un hende no ta crece, ta nos tur mester di coreccion.
E enemigo, ta gusta ora cu un hende rechasa coreccion y keda sin reconoce Dios, pa asina keda den e gara di scuridad, pasobra e enemigo ta gusta rebeldia y orguyo cu cual e ta mantene hende ciego y den su gara.
Esun cu ta stima disiplina, ta stima conocemento,ma esun cu ta odia reprendemento, ta bobo.( Proverbionan 12:1).
Tene bon cuenta:
Cuanto hende ta cana cu arma,
Cuanto hende ta corre auto bao di influencia di alcohol y droga,
Cuanto hende ta sigi huma, aunke riba e paki di sigaria ta para scirbi cu e ta contene nicotina cual ta destructivo pa bo salud.
Y laga nos wake bon locual cu awor aki ta domina mercado e Vape cual ta tin e aviso para riba dje, cu ta bisa cu e ta haci danjo,pero toch hende grandi y hoben y hasta mucha chiki ta sconde huse danjando nan salud.
E caminda di un bobo ta corecto den su mes bista, ma un hende sabi ta esun cu ta scucha conseho.( Proverbionan 12:15).
Un hende cu ta scucha conseho ta pordona y haci su curason liber, y tambe ta keda bon cu hende, pasobra e secreto ta cu ora nos pordona di curason, nos curason y nos consenshi ta keda limpi y nos ta keda bon cu Dios. ( Mateo 18:35) Mateo 6:14-15).
Dios ta coregi tur hende, hasta esnan den posicion di mas halto, pero hopi biaha hende ta kere cu nan sa tur cos y no tin mester di coreccion, y eynan ta bini e tropieso.
Cuanto biaha hende ta prefera di kere den mentira y no acepta coreccion pa sigi biba den inmoralidad, den mentira, rechasando e palabra di Dios, cu ta bon pa bida di hende.
Cuanto biaha hende ta mira cu nan no por biba cu Dios, y na mesun tempo participa den hechonan di scuridad, y idolatria, pero nan ta hacie consciente, y sigi ganja nan mes,
Ora nos ta coregi nos yiu, no keda zundra dia aden dia afo, pero coregi cu amor y duna guia, pa asina tin paz y goso den coreccion.
Sinceramente, Pastor Marcel Balootje
