Segun un articulo publica pa corant Vigilante, Corte a dicta na fabor di un doño di cas y a kibra e contrato di huur. E motibo? E huurdo tabata paga su huur atrasa constantemente, tabata haci pagonan parcial, paga mitad luna, salta luna, paga un luna, keda sin paga dos y tin biaha tabata laga lunanan pasa sin haci pago.
Carta di advertencia sin resultado
E doño di cas a splica cu el a purba tur manera pa resolve e problema de buena manera. El a manda varios carta di advertencia y a duna e huurder diferente oportunidad pa drecha su situacion, pero no tabatin ningun mehoracion.
Abogado Conquet, kende a duna declaracion riba e caso aki, a enfatisa un punto clave: “Un doño di cas tin tur derecho di spera cu e huur wordo paga na tempo y completo, manera e contract ta stipula. Cumplimento di contract ta un obligacion mutuo.”
A base di esaki, Hues a considera cu e comportacion di ripiticion aki tabata un motibo legal y suficiente fuerte pa disolve e contract, ordenando e huurder pa bandona e propiedad. Pa loke ta trata e caso mes na Curacao, e doño original a bende e cas cu e huurdo aden. E doño nobo a respeta e contract di huur, pero a adverti e huurdo cu e no por sigui paga manera mal custumber cerca e ex doño. Tambe a informe cu na tur momento e mester tene e cura y rond di cas limpi y mester entrega copia di yabi na doño nobo. E huurdo no a reacciona riba ningun carta y a sigui cu su custumber di paga ora e kier, dia e kier y cuanto e kier.
Les pa huurder y doño di cas na Aruba
E sentencia aki a cay como un baño di awa friuw pa hopi huurdo. Mester corda cu, maske e situacion economico of e mercado di vivienda ta dificil, contractnan legal mester wordo respeta. Pago atrasa structural por hiba bo directamente riba caya, cu un ordo legal pa bandona e cas. Pa e motibo aki, ta hopi importante pa tanto huurdo como propietario na Aruba sigura nan mes pa:
Pone tur acuerdo por escrito:
No confia riba palabranan so. E contract ta bo unico prueba legal.
Mantene comunicacion habri:
Si un huurder confronta un problema financiero temporal, e mester papia mesora cu e doño di cas pa busca un areglo prome cu e caso escala te den Corte.
E sentencia na Curacao awor ta crea un regla di wega nobo. Hopi abogado por usa e sentencia aki como referencia ora cu nan bay corte.
