ORANJESTAD – Un golpi duro pa Ministerio Publico! Loke mester a bira un caso penal rutinario contra e hoben E.G. (22) pa traficacion di droga y posecion di arma di candela, a transforma awe mainta den un drama-show den Corte di Husticia. Abogado mr. Carlo a baha pisa contra Polis y e investigadornan di RST, acusandonan di a troce normanan legal y di a manipula e caso cu un “celular fantasma”.
E acusacion oficial di Fiscal ta bisa cu entre Mei 2025 y November 2025, E.G. lo a bende droga y lo tabatin arma di candela den su posecion. Pero e defensa a lanta un horcan cu a laga tur hende den sala di corte boca habri. Henter e caso di Ministerio Publico ta core peligro di bay den bari di sushi!
ABOGADO MES A BUSCA RIBA COMPUTER: “E NUMBER EY NO TA EXISTI!”
E bom mas grandi cu mr. Carlo a benta den Corte ta cu e investigacion completo ta basa riba un mentira digital. “Tur cos ta basa riba informacion saca for di un celular cu simplemente NO ta existi,” e abogado a bisa den vos fuerte.
Mr. Carlo a splica Hues cu el’a bay haci su mesun investigacion priva via computer y a check e number di IMEI (e identificacion unico di e celular) cu Polis a pone den nan raport. E sorpresa tabata enorme: e number ey ta un invento, e no ta existi den ningun sistema mundial! Segun defensa, tur e scuchamento di cellular, bahamento di mensahe y potretnan, ta bin di un “aparato fantasma” y e number real di e celular di G. ta totalmente otro for di loke Polis a hinca den nan relato. “For di unda RST a saca e informacionnan ey anto?” e abogado a cuestiona severamente.
SPIONAHE ILEGAL CU TECNOLOGIA SUPER SOFESTICA
Pero e escandalo no a termina ey. Mr. Carlo a acusa RST di a uza un aparato special di spionahe, conoci como IMSI-catcher, pa intercepta combersacionnan priva di e acusado. El’a recorda Hues cu e ley cu ta permiti uzo di e tecnologia aki ta existi na Hulanda, pero NO na Aruba! Segun e abogado, e uzo di e aparato aki ta completamente ilegal den e caso aki, pasobra ni tabatin permiso por escrito di e Minister competete ni di Departmento di Telecomunicacion (DTZ). “Un empleado di DTZ a duna un aprobacion, y esey no por! Akinan a actua fuera di ley,” mr. Carlo a reclama na hues.
“PRUEBANAN TA ENVENENA Y ILEGAL”
Pa e defensa a denuncia cu Polis a drenta y listra e cas di G. sin a topa cu NADA di droga ni arma, y cu Fiscal a sconde e supuesto permisonan di Hues Comisario. “Apesar cu mi a pidi e aprobacionnan pa drenta e cas, Fiscal no a duna mi nan. Pasobra nan no tin nan!” e abogado a bisa.
Pa mr. Carlo, e derecho di un proceso husto a wordo trapa y a bisa cu pruebanan aki ta “ilegal y fabrica”. El’a exigi Hues pa declara Fiscal no admisibel, y tira henter e caso den barí di sushi y laga E.G. liber mesora.
Aunke Hues pa awor no a declara Fiscal no admisibel, e cos a bira asina cayente cu Hues mes a core pospone e caso pa dia 8 di Juni 2026, ordenando Fiscal pa trece claridad urgente y manda verifica si e IMEI ey ta fantasma. Pa awor, e bataya legal a keda a keda na candela, cu e defensa canando cabez na halto, sperando pa e di dos round!
