Na aña 2014 legislador di Aruba a dicidi cu, ora un persona wordo sentencia pa bida largo, Corte Comun di Husticia mester revisa su castigo na momento cu e cumpli 20 aña den prison.
Esey ta pa determina si e persona ey talbes lo por bay den libertad condicional.
Corte Comun lo mester husga si e persona no ta un peliger mas pa hende y si e ta cla pa bolbe forma parti di comunidad.
Pa Corte Comun por yega na e decision aki, nan tin cu considera e situacion y e posicion di e victimanan y/of familiarnan cu hopi atencion.
Ley ta bisa cu si Corte Comun dicidi cu no ta laga e persona liber, lo mester bolbe revisa su castigo cada 5 aña di tempo.
Esaki ta prome biaha na Aruba cu ta revisa un castigo di prison di bida largo; Corte Comun a cuminsa trat’e na februari 2026.
Na februari 2026 e investigacion a wordo posponi pa 31 di augustus ultimo, cu e peticion enfatico di Corte Comun pa scucha e familiarnan y tende kico nan punto di bista ta.
E preso di cual ta trata yama C.A.H.
Segun Corte Comun, falta hopi tempo ainda pa determina ki condicionnan lo mester cumpli cu ne pa por yega eventualmente na considera pa laga C.A.H. liber.
Pa es motibo Corte Comun a dicidi pa pospone e revision cu un aña: te 2027.
Ademas Corte Comun a pidi Ministerio Publico pa inform’e aki 6 luna con tur cos ta bayendo.
Mirando cu e legislador a hinca e revision aki den Codico Penal, gobierno di Aruba a lanta un asina yama “Comision Castigonan di Bida Largo”.
E comision aki ta encarga cu acumula e informacion necesario pa Corte Comun por encarga debidamente cu e revision.
Punto di salida di e legislador ta cu continuacion di e castigo tin sentido solamente si e ta sirbi un meta rasonabel.
Na mes momento ta tene cuenta cu e interesnan di comunidad di Aruba y cu e posicion di e victimanan y/of familiarnan.
Ayera famia di un di e victimanan di C.A.H. tabata den sala di Corte pa trece nan punto di bista.
Nan a bisa claramente cu nan no ta haya cu e persona por bay liber.
Particularmente e hecho cu C.A.H. nunca no a mustra di ta arepenti, ta pisa hopi pa e famia.
C.A.H. mes tambe tabata den sala.
Corte Comun a papia cu ne y a pon’e na haltura cu e punto di bista di e famia lo wordo tuma den consideracion na manera explicito den e decision final.
