Minister di Vivienda, Infrastructura, Servicio Interno y Telecomunicacion drs. Rene Herdé, tabata presente den Caya Grandi hunto cu director y team di Departamento di Obra Publico (DOW), pa presencia e lansamento di proyecto piloto cu e mashin specialisa di RJ Road Cleaning and Services, Sweeper Machine cu ta bari y steam e vloer specialisa den limpiesa di tegel / klinker den e area.
Durante e prueba, e mashin a demostra con e ta funciona riba klinkernan existente den Caya Grandi. E intencion ta pa evalua un manera mas efectivo di haci caya su superficie limpi y contribui na un miho mantenimento di e area.
Caya Grandi ta presenta algun reto specifico ora ta trata di limpiesa. Ademas di tene cuenta cu e tipo di superficie, mester tene cuenta tambe cu e railnan di e tram cu ta pasa den e caya. Esaki ta exigi cu cualkier metodo of ekipo cu ta uza den e area, mester adapta na e infrastructura existente y por ehecuta e trabou di forma cuidadoso.
E proyecto piloto ta relevante tambe mirando e esfuersonan pa revitalisa centro di Oranjestad. Mientras cu diferente iniciativa ta enfoca riba duna Caya Grandi un impulso nobo, mantenimento y limpiesa ta forma un parti importante pa conserva e area den bon condicion.
Como un di e zonanan central di Oranjestad, Caya Grandi ta ricibi diariamente un fluho considerable di residente y bishitante. E uzo intensivo di e area ta pone un demanda adicional riba limpiesa y mantenimento, haciendo necesario pa sigui busca metodonan efectivo pa atende cu e espacio publico.
Pa Minister Herdé, e oportunidad pa haci e prueba aki ta cuadra den e atencion cu su ministerio ta duna na mantenimento di infrastructura y revitalisacion di centro di Oranjestad, mientras cu e iniciativa ta conecta tambe cu e esfuerso mas amplio di Gobierno pa mantene Aruba limpi y cuida su espacionan publico.
E proyecto piloto lo permiti DOW evalua e funcionamento di e mashin y mira con e metodo por contribui na limpiesa y mantenimento di Caya Grandi.
