Diamars 22 di november 2022, lo bay tin e elecion pa bestuur nobo di Aruba Sports Unie (ASU). E elecion a cuminsa luna pasa caba cu e elecion pa e presidente di ASU. Señora Soraida Boekhoudt di Aruba Domino Bond a gana y ta e presidente nobo di ASU.
Muy probablemente esaki no lo a cay den bon tera cerca e miembronan di bestuur y mesora a schors e reunion. Despues di casi un luna e bestuur a yama e reunion atrobe y diamars awo lo tene e elecion pa bestuur nobo di ASU.
Mientras tanto algun dia pasa a cuminsa circula un audio/video riba red social, cu ta mustra den direcion di un corupcion deportivo hamas bisto na Aruba.
Den e audio por scucha con un di e miembronan di bestuur di ASU actual ta trata na influencia e elecion di mayan, mandando un voice pa un of mas persona cu tin derecho di voto, por scucha claramente con e lo fix algo pa e persona aki, door di scrap un debe pendiente cu ASU, e esaki ta djis pa acambio e haya su voto. Locual e miembro di ASU ta bisando e persona, ta mustra claramente cu ta trata aki di soborno.
“Ruman mi ta bay papia cu bo señora awe atrobe. Mi ta bay papia cu bo señora awe. Bo sa cu nan ta bisabo, cu ora tin candela y bo kier sali sin kima, bo tin cu haci un par di cos. Dus awo abo cu bo señora ta vlam grandi, cu ami tin cu page. Mi ta bay dun’e un oferta ki gewoon, bise gewoon, mi ta bay kita e debe cu tin di ASU, clean bo gewoon hacibo limpi limpi. pero jaa bo tin cu sigurami algo si. jaaa mi ta bay bise, con cu bay bin, Jerry a catch e message di bo ayera si.. E la catch’e cu e mester traha un tiki mas cu su hende nan y stop di h..e. lijm riba hende cu no ta duna nos un c..o, tur cu ba lijm riba dje, tur ta hinca dede den bo c.l.”
Cumpramento di voto a sosode tambe riba nivel mundial, algo similar a sosode den FIFA. Na mei 2015 a tuma luga e di 65 congreso di FIFA na Zürich, Switzerland. E congreso aki tabata pa elegi un presidente nobo pa e organisacion mundial di futbal. Durante e congreso 7 funcionario di FIFA a wordo acusa pa FBI, como sospechoso di corupcion, labamento di placa y soborno.
E elecion pa presidente di FIFA na 2015 a wordo influencia, door di varios e funcionarionan di e organisacion cu a soborna varios persona cu tabata tin derecho di voto. Despues di e elecion principalmente e asociacionnan di futbal Europeo a exigi pa e presidente cu a wordo elegi durante e congreso aki, Sepp Blatter tuma su retiro. Na comienso e no kier a rasona, pero despues e mes a dicidi di retira, mirando cu e no por a conta cu e apoyo total di asociacionnan di futbal rond mundo.
Despues di 7 aña un miembro di bestuur di ASU ta haciendo algo similar, door di trata na soborna un of mas persona cu tin derecho di voto pa un bestuur nobo di ASU.
