Inteligencia Artificial ta aumentando cu un forsa barbaro, y hopi lo kere den dje, tur cos a bira digital, y lo bira mas digital, pasobra hende lo kere mas den material cu den Dios.
Ya pronto mundo lo ta yena cu robot, y robot lo haci trabao di hende, pasobra robot no ta baha cu pension, robot no ta cobra pension, asina ta cu robot lo baha gasto mundialmente y segun technologia robot lo produci mas.
Pesey Bijbel ta papia di gran decepcion, pasobra tur locual ta e technologia y comunicacion moderno lo laga hende na caya, imagina bo cu bo ta drenta un negoshi y bo no por cumpra pasobra e computer ta down.
Bo ta bay un compania estatal pa paga un cuenta bo no por paga pasobra e computer ta dowm.
Bo ta bay banco bo no por saca placa pasobra e computer ta down.
Bo ta bay dokter e secretaria no por duna bo resultado pasobra e computer ta down.
Tin situacion asina teribel cu bo tin cu bini mayan cu Dios kier, pasobra pa awe e computer ta down.
Awe tene bon cuenta pasobra manera ciencia ta aumenta e mesun computer , y e mesun inteligencia artificial lo traha un dia y bisa bo cu Cristo ta bini awe, of E a bini ayera caba.
Dicon e ta bay bira asina pasobra tras di tur e inteligencia cu ta aumenta barbaramente riba e mundo aki, e spirito di anticristo ta meti.
Bo sa dicon e ta cohe tanto poder? Pasobra pa falta di conocemento hende ta acepta tur cos cu bini na moda, pensando cu door cu e ta bay mas lihe e ta mas mihor, sin wak cu e sistema di mundo ta domina nan bida, y cu e resultado final cu nan lo bay acepta e marca di e bestia, pasobra sin dje, e anticristo lo no permiti ningun negoshi funciona.( Apocalipsis 13:17-18).
Hopi ta pensa cu e anticristo ta un persona, si di berdad e lo bira un persona, pero mientras cu e no manifesta e sistema di mundo e techonologia, e ciencia, e cambio di ley, e inmoralidad y abominacion, lo traha caminda pa e cana pa ora e momento yega e por tuma dominio.
Pasobra anticristo lo bini cu tur cos cu ta anticristo, y lo mata esnan cu ta kere den Cristo pasobra ta nan ta e unico nan cu lo opone contra di su mandato y maldad.
Pesey Dios a entrega su unico Yiu pa ken cu kere den dj’E lo tin bida eterna.
Cristo Hesus a bisa Ami ta e caminda . E berdad y e bida , ni un hende por yega serca e Tata sino ta pa medio di Mi.
Ningun hende cu no tin Cristo Hesus den nan curason y no ta biba pa Cristo no por hereda e reino di cielo.
Den Juan 14:1-4 Cristo Hesus ta bisa: No laga boso curason bira intrankil, kere den Dios, kere tambe den Mi. Den cas di Mi Tata tin hopi lugar di biba, si no tabata asina lo Mi a bisa boso, Pasobra Mi ta bay prepara un luga pa boso. Y ora Mi bay y prepara un luga pa boso,lo Mi bin atrobe y ricibi boso serca Mi, pa caminda Ami ta, boso tambe por ta. Y boso sa unda mi ta bay y e caminda boso sa.
Ta tempo pa para firme , pasobra lo bini bruhado di tera cu lo pone hende desvia for di e berdad y keda decepciona.
Mantene boso bista riba Cristo Hesus solamente,
Sinceramente, Pastor Marcel Balootje
