Como parti di e esfuerso pa revitalisa centro di Oranjestad y San Nicolas, Korps Policial Aruba lo hunga un rol importante enfoca riba supervision, orden publico y siguridad den e area.
Korpschef Ramon Arnhem a splica cu dentro di e iniciativa nobo, e rol policial ta claramente defini: mantene presencia activo, supervisa comportamento y sigura cu reglanan ta respeta.
“Si nos kier logra cambio, mester tin supervision y cumplimento. Nos lo ta presente den caya, canando, vigilando y actuando ora ta necesario,” Arnhem a indica.
Segun e Korpschef, Cuerpo Policial no ta opera isoladamente, pero como parti di un esfuerso conhunto cu otro instancia. E enfoke ta riba colaboracion pa logra un centro di ciudad cu ta mas sigur y ordena.
Un aspecto importante di e strategia ta e presencia visibel di polis riba caya. Patruyanan na pia y vigilancia activo lo forma parti di e enfoke pa mantene control y preveni situacionnan cu por afecta siguridad.
Ademas, e Cuerpo Policial lo tuma un rol den identifica y canalisa persona cu ta den situacion vulnerable, trahando hunto cu otro partnernan pa logra un trato humano y structural.
Arnhem a enfatisa cu e meta principal ta mehora e siguridad y bida den centro di ciudad.
“Nos ta enfoka riba comportamento y siguridad. Nos lo intervini ora ta necesario, pero tambe guia y orienta,” el a agrega.
E rol policial den e iniciativa aki ta contribui directamente na crea un ambiente unda comunidad, comerciante y bishitantenan por sinti nan mes mas sigur.
