Despues di e prome tres edicion, Cuida Aruba ta drentando un fase nobo, mas dirigi riba participacion activo di comunidad, trabou boluntario di empresanan y gruponan den comunidad, y riba educacion. E meta ta pa stimula un cambio duradero den mentalidad y comportacion relaciona cu nos medio ambiente.
Durante e ultimo lunanan, Cuida Aruba a mobilisa boluntarionan, organisacionnan, empresanan y scolnan pa haci limpi na diferente luga na Aruba. E lesnan di e prome tres edicion lo wordo incorpora den e siguiente fase.
Mas flexibilidad: cada grupo por organisa su accion na un momento cu ta cumbini nan mas
No tur empresa, organisacion of grupo di boluntario por participa riba un dia fiho. Pa e motibo aki, Cuida Aruba lo no traha cu un dia fiho mas. Empresanan, fundacionnan, scolnan y gruponan di boluntario por organisa nan propio clean-up na un fecha y orario cu ta cumbini nan miho, pa asina mas organisacion y boluntario por participa. Cuida Aruba lo sigui coordina e esfuersonan pa e accionnan den un forma diferente, pa e impacto por keda wordo sinti rond di Aruba y tambe pa sigui sostene e gruponan cu preparacion y material necesario.
No lo tin accion di container den bario pa fin di oktober
E Zona di Desperdicio a haya hopi mas acogida y cada bes mas ciudadano ta haci uzo di e facilidadnan existente, locual ta haci e necesidad pa container den tur bario menos grandi. Pa e motibo aki no lo tin container den bario pa fin di oktober; e enfoke lo ta riba accionnan di limpiesa cu boluntarionan. Lo considera pa ofrece baki den bario un biaha mas prome cu december, specialmente pa San Nicolas.
20 te 30 luga pa haci limpi prome cu fin di aña
Cuida Aruba a publica un lista di aproximadamente 20 te 30 luga rond di Aruba cu ta den necesidad di un limpiesa prome cu fin di aña. Empresanan, fundacionnan, scolnan, gruponan di boluntario y otro organisacionnan por scoge un di e luganan aki pa nan propio clean-up. E lista ta disponibel riba www.cuidaaruba.com.
Varios empresa y organisacion ta organisa accionnan di limpiesa caba, y nos kier stimula esaki mas ainda. Sin embargo, miho coordinacion ta necesario pa evita cu tur grupo ta concentra riba e mesun areanan, manera area di hotel of camindanan principal, y pa asina otro parti di Aruba tambe haya atencion. Relaciona cu esaki, Cuida Aruba ta colabora cu Bureau City Inspector (BCI), Departamento di Obra Publico (DOW) y Serlimar, cu ta e departamentonan cu ta encarga cu e coordinacion di recogemento di e sushi despues di cada accion.
Di limpiesa periodico pa responsabilidad comparti
Cuida Aruba kier bira mas cu un accion di limpiesa algun biaha pa aña. Nos kier stimula un cultura caminda ciudadanonan, empresanan, scolnan y organisacionnan social ta sinti un responsabilidad comparti pa e limpiesa di nos isla. CEDE ARUBA lo sigui contribui cu coordinacion di boluntarionan, mobilisacion di organisacionnan y colaboracion cu partnernan. E maneho structural di desperdicio, incluyendo e facilidadnan pa entrega y procesa desperdicio, ta keda responsabilidad di Gobierno.
Educacion y cambio di comportacion
Educacion y consciencia, specialmente entre muchanan y hobennan, ta un prioridad importante. Nos lo sigui desaroya e colaboracion cu scolnan, pa muchanan compronde for di un edad jong caba e importancia di cuida nos medio ambiente, y pa un Aruba limpi bira parti di nos comportacion diario.
Mas colaboracion den comunidad
Cuida Aruba lo busca mas conexion cu organisacionnan di bario, iniciativanan di habitantenan y otro partnernan social. CMO hunto cu tur partner ta explorando un programa specifico pa barionan y complehonan residencial di FCCA, cu ta contribui na un ambiente mas limpi y na mas participacion y cohesion social, caminda habitantenan mes ta hunga un rol activo.
Un esfuerso conhunto pa un Aruba mas limpi
Cuida Aruba ta basa riba colaboracion estrecho entre CMO, DOW, BCI, DNM, Serlimar y CEDE ARUBA, pa menciona algun. Cada partner tin su propio responsabilidad, pero e meta ta comparti: un Aruba mas limpi, mas agradabel y mas sostenibel.
Cuida Aruba ta invita empresanan, scolnan, fundacionnan, organisacionnan di bario y tur ciudadano pa participa den e accionnan di limpiesa durante e ultimo lunanan di aña.
Un Aruba limpi no ta solamente responsabilidad di gobierno.
E ta un responsabilidad di nos tur.
Cuida Aruba – Hunto nos ta cuida nos isla!
