Tabata Diadomingo marduga pa 12:50 am, cu chauffeur masculino di un Ford EcoSport color shinishi cu number A-75657 moviendo di Tanki Leendert direccion Paradera, a baha di caminda banda robez, y bay dal direct y duro riba un Suzuki Swift Sport color blauw para dilanti un cas. E impacto a pusha e Suzuki bay dilanti, y na mesun momento e Ford a bay dal den cura di e cas, bashando esaki abao, pega riba 2 pilar, y benta e gate di hero abao. Paden di cura por a mira bloki benta tur caminda como tambe glas.
Tanto Polis y tambe Forensys a yega na e lugar, como cu tabatin indicacion cu e chauffeur tabata trata di start e auto bek y purba bandona e lugar.
Polis a yega y atende e chauffeur riba loke a socede, y mesora nan a ripara cu e tin caracteristica di un persona cu ta bao influencia. Nan a pidi su cooperacion pa e haci un test di supla, sinembargo e no por a haci’e. Pues a keda Polis nada otro di pone boei na su man, y busca Vehiculo di Transporte pa hibe Warda di Polis, unda el a ser presenta dilanti Fiscal Auxiliar, kende a duna ordo pa e keda encarcela pa saca su wayaba.
Daño material ta bastante, y Polis a nota cu den e Ford EcoSport tabatin monton di material di metsla, y a deduci cu e chauffeur ta metsla di profesion, pero e anochi ey a mira demasiado den e boter.
