Riba e mundo aki placa ta locual nos tur mester, pa nos por biba, cune nos ta cumpra , cune nos ta paga y cune nos ta cumpli cu nos debernan.
Pero e no mester bira un obheto di adoracion, caminda placa tin dominio riba hende caminda hende su amor pa placa ta bira asina grandi cu nan ta perde control di nan mes ora nan no tin placa.
Mescos tambe ora hende tin hopi placa, nan ta bira manera robot, tur cos ta nan placa, y hasta nan ta lubida riba Dios, pasobra e efecto cu placa ta haci riba nan bida, nan ta lubida for di unda Dios a saca nan.
Laga boso karakter ta liber di amor pa placa,y sea contento cu loke boso tin,pasobra e mes a bisa: Nunca lo Mi no bandona bo y nunca lo mi laga bo desampara.( Hebreonan 13:5).
No laga placa kita bo bista for di riba Dios, no biba bao di dominio di placa, pasobra placa no ta tur cos.
No ta tur ora rikesa ta nifica felicidad.
Placa no por sana hende , pero Dios si ta nos sanador.
Ora un hende su bida ta kibra, placa no por restaura su bida, pero Dios di por.
Un hende por tin hopi placa drumi riba un cama di malesa, pero su placa no por lante, pero Dios si por.
Placa no ta mantene un famia uni, pero e poder di Dios si ta trece amor y union den cas.
Hopi hende ta bringa pa placa, pero despues nan ta nota cu ta tempo perdi.
No stima placa mas cu bo famia, especialmente no benta bo yuinan afo y bay tras di placa.
E necesidad di hende den bo bida, placa no por reemplace.
E berdadero carinjo y amor no por wordo cumpra, placa no por pone hende stima bo.
Pa motibo di placa hopi hende ta bira materialista, y ta lubida riba Dios.
Esnan cu ta balora nan amistad cu placa, no conoce berdadero amistad.
Un matrimonio basa riba placa,ta un matrimonio sin base.
No traha mata bo curpa pa placa, y lubida riba Dios y bo famia.
No bende bo mes pa placa, no laga placa move bo bida, bo no por sirbi Dios y placa.
E lugar mas halto den bo bida, mester wordo ocupa door di Dios, y no wordo domina pa placa.
Mi Dios lo provee tur locual boso tin mester, segun Su rikesa den Gloria den Cristo Hesus.( Filipensenan 4:19).
Awor nos tin cu compronde cu rikesa y bondad, amor y pas ta bini di Dios.
Hopi rico no por drumi anochi, pasobra nan ta pensa kico ta haci cu nan placa, pero ora Dios ta na prome lugar den bo bida, lo bo drumi, den tur pas y trankilidad.
Ma di berdad santidad acompanja pa contentamento ta di gran ganashi, pasobra nos no a trece nada den mundo,y nos no por hiba nada for di dje tampoco.(1Timoteo 6:6-7).
Rikesa por hiba hende den tentacion extremo, y malicia y inmoralidad ta coopera cu esey, pa mantene hende den scuridad,
Hopi hende ta lanta nan yiu cu un conocemento financiero hopi amplio,y no ta preocupa pa e conocemento spiritual.
No custumbra bo yiu , cu pa tur cos cu e haci mester dune placa, sinja bo yiu pa e balora Dios, cas y famia, estudio y bon conducta mas cu placa.
Pasobra amor pa placa ta rais di tur sorto di maldad,y algun hende, door di desea esaki, a desvia for di fe, y a traspasa na mes cu hopi dolor. ( 1 Timoteo 6:10).
Sinceramente, Pastor Marcel Balootje
