Gobierno di Aruba a publica un Landsbesluit pa presta te cu 50 miyon florin for di Sociale Verzekeringsbank (SVB). E interes ta 3% pa aña i e prestamo lo corre pa tres aña. Riba prome bista, esaki por parse un bon negoshi. Pero e pregunta ta otro: dicon gobierno ta haci esaki i dicon pueblo no ta haya tur e informacion? Dicon den secreto ? Sin informacion ?
SVB no ta un banco cu por presta placa manera un institucion comercial. SVB ta un instituto cu ta maneha reserva cu ta pertenece na trahadornan, pensionadonan i tur hende cu ta contribui pa e sistema di siguridad social. E placa aki no ta di gobierno; gobierno ta solamente pidi pa presta di dje, mescos cu nan a haci den pasado.
Sinembargo, e Landsbesluit no ta bisa di cual fondo e 50 miyon florin lo sali. No tin un analisis publico di e consecuencianan pa e liquides ni pa e solvensia di SVB. Pueblo mester simplemente tin fe cu tur cos ta bon. Den un estado di derecho, fe no por remplasa transparencia.
Tambe ta sorprendente cu gobierno no ta splica unda e placa ta bai. E documento ta papia solamente di “financieringsbehoefte”. Esaki por nifica tur cos i mesun tempo no nifica nada. Si pueblo ta paga impuesto, pueblo merece un splicacion cla: Ta pa cubri gasto corriente? Ta pa paga otro debe? Of ta pa cubri e presupuesto cu no por wordo sera?
Mas preocupante ainda ta cu e prestamo no lo wordo amortisa durante e tres añanan. Gobierno lo paga solamente interes, mientras cu e 50 miyon florin mester wordo paga den un solo biaha na 31 di juli 2029. Si e placa no tey, Aruba lo mester presta di nobo. Esaki no ta soluciona e problema; ta pushe pa otro momento den futuro.
Gobierno a bisa cu e prestamo di SVB ta mas barata cu e prestamo di 160 miyon dollar cu a wordo fia den mercado internacional. Esaki ta berdad. Pero un interes mas abou no ta automaticamente haci un desicion bon. E pregunta ta si ta prudente pa usa reserva di un instituto social pa financia e gastonan di gobierno, especialmente ora no tin claridad tocante e riesgo.
Pueblo mester puntra: si SVB por presta 50 miyon florin na gobierno, con sigur e reservanan ta? Tin un estudio independiente? Banco Central a evalua e impacto? Parlamento a ricibi tur e informacion? Te awor, e preguntanan aki no tin contesta publico.
Un gobierno cu ta kere den bon gobernacion no mester publica solamente un Landsbesluit. E mester sali dilanti di pueblo, duna un splicacion completo i laga expertonan i Parlamento evalua e decision. Transparencia no ta un fabor; e ta un obligacion.
Pueblo di Aruba no por sigui wak manera reserva publico ta wordo movi sin splicacion. Confiansa den gobierno no ta gana nada cu secreto, sino cu apertura, responsabilidad i duna cuenta. Te ora e informacion completo no ta disponibel, e pueblo tin tur derecho di sigui puntra: Kico gobierno no kier conta nos?
